Mizoram Journalist Association chuan kumin Republic Day lawmna pui ber Lammuala an thutna tur Press Enclosure siam a nih loh avang leh Lammual leh Governor at Home sawmna an dawn danah an lungawi loh thu an sawi chhuak a. Hemi bawhzui hian Home Minister K. Sapdanga leh DIPR&PS Minister B. Lalchhanzova te chuan sawrkar lama mawhphurtute an sawipui ta hial a ni.

Kum dang­ah chuan Republic Day lawmna Lammual leh Go­vernor at Home-ah hian sawrkarin Accredited Journalist a tihte chu a sawm thin a. Kumin hian sawmnaah an hming ziak lohin a hlawm tawpa Press Club lama dah a ni a, Lammual lamah kum tina awm thin Press Enclosure siam sak an ni lo bawk a ni.

Republic Day hi India ram democracy a siamtu Danpui neih lawmna ni a ni a, chu Danpui chuan 'Mahni ngaihdan, dik nia hriat sawichhuah dikna chanvo' (Right to Freedom of Speech and Expression) article 19 (1) hmangin mitin a pe a. India Danpuiah hian press mite tan chanvo hran ziahlan a ni lem lo nangin article 19 (1) hi India ramah chuan press mite lungphum a ni tlat si a. Hemi denchhen hian Press Council of India pawhin kaihhruaina a siam ta hial a ni.

Mizoram-a journalist te pawhin 'Republic Day kan lawm' an tih hian Rampum huap ni pawimawh anih avanga ngai pawimawha a lawmnaa tel an ni zawk tih hriat a tha ang.

Democracy sawrkar-ah chuan Legislative, Executive leh Judiciary an awm a, Media chu Banpui Palina tia sawi thin a ni a. Legislative emaw Executive emaw te'n press nekchep zawnga rilru an put palh chuan boruak tha lo deuh awmin a tuar­tu mipui an ni zel dawn a. He­tiang ni pawimawh a he­tianga Mizoram Journalist te benghniam tumna anga lang thei thil thleng hi a pawi hle a. Bakah Republic Day inpuahchahnaah pawh sawi fel vek tawh a ni zawk a, press enclosure siam hi thil harsa a ni hauh lo a. A hranga press mite thutna siam hian Legislature leh Executive laka Press an hranna a entir tia sawifiah a ni hial thin zawk. 

Kum 60 lai Mizoram-a media hmanga mipui rawng lo bawl tawhtute zingah senior pawlin khawnvar hnuaiah type writer nen bul an lo tan a. Khawvel thang zel milin phek hlai (broadsheet) ah leh electronic media lamah mipui an kaipui leh a. Mi zawng zawng kuta awm third party platform in min chim mek laiin mek laiin digital media lamah an inphun nghet chho mek a ni a. Hetiang zinkawng an zawh laia a bul thut ngaihtuah miah loa a lera lo thuai tumna nia ngaih theih hi bo se a duhawm hle.