Mizoram hi thlawhna, rel leh motor kawngpui ten a pawh ve ta a. Mahse heti chung hian nitin mamawh kan lakluhna pui ber erawh motor a ni a, ni hnih khat lek pawh kawng a chhiat chuan kan buai nghal der mai a ni. Chutih karah kan chak lakna ber kawng Sairang leh Vairengte inkar a tha hlei thei lo hi chu a manganthlak tak zet.

Sawrkar kal tawh a ni emaw tun sawrkar, ZPM kaihhruai ngeiah pawh kawng hi a tha hlei thei lo tlat mai a. Heti tak maia kan chak lakna ber kawng a tha hlei thei lo hi a tuartu chu mipuite kan ni a, nghawng nasa tak a neih vangin tih tak zeta sawrkar hian kawngpui tha hi a vei a ngai ta hle.

Mizorama kawngpui sial reng reng hi a tir chuan mam tha tak ni mahse a daih rei thei thin lo hi a pawi tak zet a, hei hi a chhan chhui chiana kawngpui tlo zawk kan neihna tur ngaihtuah hi a hun tak zet tawh a ni. Kawng chhiat chhanah hian puh tur tam tak a awm ngei dawn a, truck ten an phur rit lutuk tih te, fur ruahtui tlak tamna hmun kan nih vang te, lung chang tha hman tur kan neih loh vang leh chhan dang engemaw zat a awm thei ang. Mahse India hmarchhak, ruahtui tlak tam ve thona state dang ten kawngpui an neih that laia kan kawngpui a chhe hma bik nia lang hi chu uluk taka a chhan chhui a, a damdawi hmuh chhuah ngei a pawimawh.

Silchar kawng kan tih mai, Sairang atanga Vairengte inkar pawh hi a chhiat lutuk avangin tun hnai khan siam a ni a. Mahse tunah chuan tlan hleih theih loh khawpin a chhe leh tawh a, sawrkarin sum tam tak a senna chu engmah lovah a chang ta tihna a ni a, a uiawm tak zet. Tunah pawh kawng siam turin NHIDCL chu a in ruahman mek a, mahse a hma ang thoa an siam chuan rei a daih leh lo ang tih hlauhawm tak a ni. Tun dinhmunah hi chuan NHIDCL lakah hian mipui ten rinna an nghat ngam lo tih a chiang reng a. Chuvangin a vilpui kawngah sawrkarin a tan a ngai hle tih a lang a, kawng siamna tur sum hi dil chhuah mai mai har tak anih avangin a changtu PWD pawhin nasa leh zualin vil thei se a duhawm hle.

Kawng hi a that loh chuan bungraw phurhna man a to lo thei lo a, chu chu mipuiin an tuar thin a. Chumai bakah lirthei a chhiat phah nasa a, thawk khat lai phei kha chu Mizorama tlan tur truck pawh zawn fe a ngai niin an sawi hial. Silchar kawng a ni emaw Mizoram chhung kawngpui dang pawh nise NHIDCL leh company dang pawhin siam dawn se kan ram chhung kawngpui siam tur an nih miau vangin vilpui leh enkawl kawngah sawrkar hian mawh a phur a ni tih a hriat thar fo a ngai a. Heti tak maia Mizoram kawngpui a chhiat chhan hi a chhiat tak tak hmaa siamthat (repair) a nih loh vang niin a lang a, chuvangin hun kal zel turah pawh sum sen a tam hmain repair thuai thuai thin nise heti em em hian kawng hi a chhiat a rinawm loh a ni. Sawrkar hian uluk takin kawng siam tur hi enzui zel thei se a duhawm hle.