Hmasawnna thlentu hrang hrang zingah kawngpui tha hi a pawimawh ber zinga mi a ni. Kawngtha neih chuan veivah a awlsam bakah thil lei leh hralh a awlsam a, hun tam tak khawhral tur a veng bawk. Mizoram chhungah ngei pawh kawngpui tha a awm hnua hun leh tha, sum leh pai kan hmang tlem ta hle. Entirnan Lunglei chu tunhma deuh chuan zing hma takah chhuakin thim hnuah te an thleng thin a, kawngpui tha a awm chuan ni lenga hun hman thinnaah khan an lehlang ta mai mai a. Chutiang zelin tunhma deuh chuan phai lama zin mite chuan Silchar-ah riah hman hram tumin an inbuatsaih thin a, kawng a that erawh chuan darkar 6 emaw kal lek a ni. Hei hian kawng tha neih a hlawk zia chiang takin a lantir a ni.

Mizoramah kawngpui tha engemaw zat siam ni thin tawh mahse heng kawngpuite an tlo lo em em mai hi a mangan thlak tak zet a. Kawng enkawltuten chhuanlam chi hrang hrang siam thin bawk mahse hmun danga kawngpui siamte ai hian a chhe hma bik niin a lang. Mizoram chak lakna ber Silchar kawng kan tih mai pawh hi a khat tawk chuan siam ni bawk mahse rei a daih thei lo lutuk hi a pawi hle. He kawng vang hian kum dangah pawh harsatna chu lo tawk thin bawk mah ila kumin ang em ema a chhiat hi a la awm lo niin a lang a, hei hi a chhan ber chu siam hun laia siam a nih loh vang a ni.

Mizoram chak lakna kawng NH 06 leh NH 306 enkawl chungchangah hian Mizoram sawrkar PWD leh NHIDCL te chu an inpuh tawn a, mahse thil chiang nia lang ta chu he kawng siamthat (repair) theih lai khan Mizoram PWD kutah a awm tih hi a ni. Kan hriat angin tlangram, ruah tui tlak tamna, lung chang tha awm tlemna leh leimin tamna hmuna awm kan ni a. Chuvang tak chuan state dang ai chuan kan kawng hi a chhe hma bik em em a, chuvangin uluk taka enkawl a, thal laia a chhe zual lai siam (repair) ngei ngei ngai a ni. Hetia thal laia siam anih hian siam tur a tlem avangin senso pawh a tlem a, a chhe zel tur a veng bawk.

Kawng chhia vangin nitin mamawh phur lirtheite an tlan thei lo a, mipuiin harsatna nasa tak kan tawk mek a. Tun dinhmunah sawrkar chuan theihtawp chhuahin hma a la a, a lawmawm rualin thal lai khan hmalak nise chuan heti em em hian kan buai lo tur tih hi mi tam tak ngaihdan a ni. Tunah chuan kawng khuar zual laiah boulder-te dah ni mahse ruahtui tlak lai anih avangin alkatra hmanga char theih a ni dawn lo a, hei mai bakah lirthei lianin an rap ang a, reiloteah a chhe leh mai in a rinawm. Engpawhnise tih tak zeta sawrkar hmalakna hi a lawmawm a, tuna kan harsatna tawh mek hi kum thar lama kan inzirna tur ni thei se a duhawm hle.