School Education Minister Dr. Vanlalthlana chuan tun hnaia Mizoram Secondary School Teachers' Association khawmpui a hmanpuinaah zirtirtute fuihna thu sawiin kohhran leh khawtlang rawngbawlna ngaih pawimawh avanga school kal tlai, ban hun hmaa haw leh class lak thulh awm tawh lo se, rawngbawlna lama an tui a nih chuan full-time in inhmang tlang law law zawk turin a ti a. Hei bakah hian rawngbawlna in zirna tibuai lo se a duh thu sawiin, Headmaster te pawh discipline tha taka keng kawh turin a chah bawk. School Education Minister in hetia huai tak maia a sawi hi a fakawm a, a tih hlawhtlin kawngah pawh hma la nghal se a duhawm hle.

Khua leh veng hrang hrang han en ila, tlawmngai pawl hruaitu fel tak tak hi sawrkar hnathawk an ni duh khawp mai a. Chutiang bawkin kohhran lama in hmang leh kan chhuanvawr chu sawrkar hnathawk bawk an ni duh a. A bikin kohhran Upa-ah phei chuan zirtirtu an tam lawr lakin a rinawm, hei hi a chhan chu an fel vang tih a chiang hle awm e.

Mizo society hi inpawh tak mai kan ni a, zirtirtute mai bakah zirlaite pawh khawtlang leh kohhrana in hmang turin kan beisei a. Hei hi kawng lehlama thlir chuan a awmna lai tak te pawh a awm ang a, mahse zirlai nih chhung chuan khawtlang leh kohhrana in hmang tura kan phut thin hi chu kan sim a tha hle. Zirlaite chuan an zirna chauh ngaihtuah se, chuti ni lova khawtlang thil YMA leh thildang bakah kohhran thalai thiltihna hrang hranga an in hmaan tam chuan an zirna in a tuar nge nge thin. Zirlaite chuan taima takin an zirna lam ngaihtuah se, an zir chhuah hunah khawtlang leh kohhranin a tangkai pui zawk dawn a ni.

Chutiang zelin sawrkar hnathawkte pawh an hnaah rinawm thei zel se a duhawm. School Education Minister hian a department chan zirtirtute hi a fuih a ni mai a, mahse department dangte pawhin anmahni fuihna a ni tih an hriat a pawimawh hle. Sawi tawh angin zirtirtute hi an pawimawh leh an fel vangin khawtlang leh kohhranah pawh nihna pawimawh tak tak an chelh fer fur a, hemi chhuanlama an hna an kalsan fo anih chuan thil fel lo tak a ni.

Kan ram zirna han thlir ila, kumtin mai tih theih deuh thaw sawrkar school-ah zirlai an tlem tual tual a. Training pawh nei tha lo zawk leh thiamna kawngah pawh chhuanawm loh zawka ngaih private school kan bawh zawk tlat mai te hi eng nge a chhan chhui a chakawm hle. Mi tam tak chu Minister sawi ang hian kohhran leh khawtlang thil anih chuan mahni hnathawh leh eizawnna kalsan thianga ngai mai te pawh an awm ni hialin a lang. Theih ni phei se chuan sawrkar hnathawkte hi chu tlawmngai pawlah hian hruaitu ni lo se a duhawm leh zual. Engpawhnise mahni eizawnna leh hnathawh aia thildang kan ngai pawimawh anih chuan kan hnathawhah kan rinawm lo tihna a ni dawn a, chuvangin kan hnathawh hun chhung tal hi chuan rinawm leh thahnemngai taka kan thawh hi kan tih makmawh a ni tih hre thar leh ila a duhawm hle.