Tunhnaiah Kolkata Mizoram House hralh chungchangah thu inchuh a awm mek a. Kolkata Ballygunge a Mizoram house chu mipui te duhdan pawisa lovin sawrkar kalta khan a hralh niin Chief Mister Lalduhoma chuan a sawi a. Mizoram house hi hralh tawh mahse agreement ah cancel leh theihna a awm nia sawiin hralhna hi an cancel thu leh Mizo mipuite duhdan anga an neih let tur thu chanchinbumite hmaah a sawi a. Mizoram sawrkar hmalakna hi house hmun leitute chuan High Court ah khing letin Mizoram sawrkar chu thiamloh an chantir a. He thil chungchang hi Chief Minister chuan a tul angin Supreme Court thlengin hmalak an tum thu a sawi leh a ni.

Kolkata Ballygunge hmuna Mizoram House tihral chungchang hian thu leh hla a nei ngah hle a. A hralh chungchangah ah hian Chief Minister kalta Zoramthanga fapa te pawh engemaw hlawkna nei ve anga puhna te awmin Court hial an thleng anih kha. Eng chen nge he buaina hian a awh dawn a la hriat loh a, a la buai dawn chauh ni pawhin a ngaih theih awm e.

Mizoram house hralh chungchangah hian thu inchuh leh ngaihdan inang lo pahnih a awm a. Ballygunge hi hmun laili leh Mizoram sawrkarin hmun a neih hmasakna hmun anih avangin tihral mai hi ui tu an thahnem hle a. Chutih rual erawh chuan sawrkar kalta MNF khan Mizoram house hi sak that an tum a. Mahse helai hmuna building regulations hman mekah hian Mizopa chhiara chhawng thum (G+3) bak a sak theih dawn loh a, chuvangin Mizo mipuite chhuahka bera hman ni tawh Ballygunge ah hian house thar pawh sa ni ta ila mikhual an thleng tam thei dawn lo a, a dawng hlawk thei dawn lo tihna a ni.

Hemi anih avang hian sawrkar kalta khan Mizoram house awmna dang Salt Lake velah hmun tha zawk zawn nise, man tlawm zawkin hmun pawh lei theih a ni ang a, khualzin leng tam zawkin building pawh a sak theih an beisei a. Chungte thlir chuan Ballygunge lam khu hralhin, Salt lake lamah a thar sak dan zawn kha MNF Sawrkar hmasain a tum ta niin an sawi. House hralh chungchangah pawh hian dan dik loa thiltih chu a awm lo a, mahse a hmunhma hi Kolkata Mizo ten an ui em avangin sawi neuh neuh hi a awm ta anih hmel.

Engpawhnise sawrkar hmasa leh tuna sawrkar kan hrawn mek te hi an tanna lamah chuan an dik ve ve a tih theih a. An hmalakna leh tanlamah chuan thiam an inti ve ve dawn tihna a ni. Ballygunge hmuna Mizoram house buaina hian eng chen nge a awh dawn hriat a ni lo a, hun engemaw chen chu politics inbeihna atan party pahnih te hian an hmang chhunzawm zel dawn a nih hmel e.