Mizoramin rohlu kan neih zinga pakhat chu Lengpui airport hi a ni awm e. Airport hi kum tin kan chhawr tangkai deuh deuh niin a lang a, hun hmasa lama darkar tam tak tak kan kalna thinah hun reilote chhungin kan thleng thei a. Chutih rual chuan thlawhna tumhmun enkawl hi thil hautak tak anih avangin tun hnai hun engemaw chen atang khan midang kuta hlan duhna lian tak a lo awm a, hei hian inhnialna a ti tamin ngaihdan inang lo a hring ta a ni.

Kan hriat angin Mizoram chu state pachhia kan ni a, airport enkawl hi kan state ang tan chuan a hautak hle. Tuna a awmsa enkawl mai bakah tih changtlun chhoh zel a ngai a. Tuna Lengpui PCN hi 36 niin mithiamte chuan an sawi a, hetiangah hi chuan thlawhna lian tan tum a him lo a; PCN 50 tal hi duhthusam niin an sawi. Hetianga cheithat leh enkawlna atan hian kum tin vaibelchhe tel hman a ngaih avangin state pachhe tan tlin chi a ni lo a, chuvangin midang kuta hlan tum hi thiltih awm tak a ni. Mahse midang kuta hlan tur hian thui tak ngaihtuahna sen a tul a. Kan sawrkar hrawn mek hian Indian Air Force kuta hlan a tum niin a lang a, hei hi NGO leh mipui tam zawk chuan an duh lo a ni. IAF kuta hlan anih chuan khualzin tan harsatna hrang hrang a thleng thei a, hmun danga IAF enkawl tumhmun en hian mipui tam ber duh dan hi thil awm tak a ni.

India rama airport enkawltu tam ber chu Airport Authority of India an ni a, state hrang hrangte pawhin AAI kuta hlan hi an duh a, a chhan chu a tih changtlunna kawnga an thawh that vang a ni. Kan hnung deuha Union Home Minister in Mizoram a rawn tlawh tum khan Lengpui tumhmun chu AAI kuta a awm tur thu a sawi a, mahse a bawhzuina kawngah kan sawrkar hi a che chak lo hle niin a lang. Lengpui tumhmun hi AAI ten an lak theih loh thu leh harsatna a awm thu hi mi thenkhat ten an sawi thin a, mahse kan sawrkar hian tih tak zetin a la bawhzui lo niin a lang. Union Home Minister meuhin AAI kuta hlan theih anih thu a sawi chunga kan sawrkar a muang lutuk nia lang hi chu a pawi khawp mai.

Zinna leh bungraw thawnna atan thlawhna hi kan hmang tangkai telh telh a, Lengpui ngei pawh hi tih changtlun chhoh zel a pawimawhin international flight a awm theih hialna tura chei a pawimawh a. Chuvang chuan a cheitha theitu tur AAI kuta hlan ngei hi a pawimawh. IAF kutah hian awm ta se engemaw thila flight cancel te a awm fo chuan khualzin, damlohna thila phai kal ngai leh meeting pawimawha tel tum ten harsatna an tawk fo dawn tihna a ni a. Chuvangin sawrkar hian AAI kuta awm turin chak lehzualin hma la thei se a duhawm hle.