HSLC & nun kawng Mizoram Board of School Education chuan pawl 10 result a ti chhuak a, pass percentage kum 5 chhung thlir let chuan hmasawnna a tam lo hle a, nikum aiin tlemin a sang hret chauh a, 68.83% a ni. HSLC result hi 2013 kum khan 58% a ni tawka, sawisel a hlawh nasa a, chuta tang chuan hma a sawn zela tan lak erawh a la ngai hle. Eng pawh nise media a that tawh avangin kumina 1-na chelhtu Jennifer Vanrammawii, Baptist HSS, Serkawn chanchin chu chanchinbu lamah tarlan a ni nual a. Zirlai anga nitin nun a hman dan atangin zirtur a tam hle a ni. Jennifer-i chanchin tarlan zingah social media (Facebook, whattsapp leh adt). in a nun a khawih buai pha hauh lo a. Mobile phone leh FB account a nei loa hei hian lehkhazir lamah rilru a sawrbing tir thei niin a lang a ni. Tunlai rawlthar leh tleirawl te’n an buaipui em em in a khawihbuai loh zirlai a awm hi mak tih a hlawhtling mai thei a, mahse zirlai a nih chhung chuan lehkha zir chu a tih tur tih a hriat avangin kum tluanin lehkha a zir tawp mai a ni. Jennifer-i chanchin tarlannaah hian exam hnaih dawna thatchhe ar bawm khaia zir tlut tlut a nih lohzia a langsar hle a, mi tam tak lehkha zir dan nen a inang lo hle. HSLC Topper te lehkhazir dan thlir letin kum tluana zirlaia inchiah an ni tlangpuia, exam neih hmaa zir bur bur an ching lem lo. Mihring nun hrim hrimah hian thawk leh khata hlawhtlin thut theih a ni loa, harsa leh hrehawm pawisa miah loa bei tang tang thinte chu mi hlawhtling an ni duh chawk. Eizawnnaah pawh fuat ngah apiang an dingchannga, buai zual chang te chu awm mahse vawi leh khata ri buan buan chi ho chuan rei an daih lo tlangpuia; chu ai chuan nitin nunna ngaia neih tur khawpa ti peih te chu an tlo zawk fo. HSLC Topper tleirawl pawh hian subject thenkhatah beidawnna a nei rum rum thu a sawi a, mahse a tih luih tlat avangin Pawl 8 a Chhiarkawp fail chuan Pawl 10 ah ‘ber’ nihna a hauh lawi si a. Kawng tawi zawh awlsam zawk a awm lo a, hlawhtlin hmaa beih ngat ngat mai chu kalkawng awmchhun a ni. Mihring nuna bet ve tlat’ inpholan chakna’ a lian tak a, zaithiam leh thiam thil bik neite chu intihsiakna an hlawhltinin chawimawina chitin reng nen sawngbawl an ni a. Hun a rei a ‘zai’ ringawt chuan eizawn a tih hleih theih loha, thenkhat chu an talbuai fo a ni. Eng hi nge kan hlut tih enchian a pawimawh khawp mai. Lehkha zir hlawhtlingte hian ngawihsan an hlawh ta viau a. chawimawi an nih danah thahnem ngaite chuan an la duhkhawp lo hle a, khawtlang hruaitute pawhin thalai te hi hlut chin tur leh hlut tur dik an zirtir a ngai ta hle mai. Social media in thalaite nun a luah nasa a, inpholan duhna a lian a, inkawmkhawmna tura siam chu khawvel tak emaw ti an awm thluah a; rilru a hruai kawi mek a ni.Social media a chhuahna a la rei lo ema, a tha zawngin nge a chhe zawngin nghawng a neih ang tih hriat la ni lo mahse tun dinhmunah hi chuan nunphung erawh a sawi danglam tih hai rual a ni lo. Sum leh hun khawhralna hmanraw chi khat a nihna chen a awm a ni. Hemi avang hian ‘Facebook’ hrik tih tur khawpa ‘FB a hring reng thei’, chutih laiin internet khawih thiam anga inngai leh chuang si lo an kat ta nuk a nih hi. Mi chungchuangte kan sawi lai hian mi laihawl emaw lehkha zir lama harsatna tawk an awm thei a, midang hlawhtlinna avanga inhmuh hniama hlawhtlinglo tur anga inngaihna a awm thei a. Chu erawh chu ngaihtuahna dik lo a ni a, tuna topper te vek pawh hi an zir loh chuan tlar hnunga la awm thei an ni, taimakna nena beih zel chuan a hnung a awm thin te pawh a hmasaah a invawrh theih reng a ni. Zirlai dik tak zawk chu nun hi a ni a, nawhreh tel miah loa milem ziah tum ang a ni a, har tak a ni. ‘Mahni inhneh’ hi mi ropui te pawhin damchhunga an zir a ni thin reng a. Hmalam hun tur a hriat loha, mahse classroom/exama Distinction hmu thin te hian an nunah an hmu reng chuang bik lo a. Chutiang bawkin exama III Division-a inhlangkai tawkte pawhin an nunah Distinction an kai thei tho a ni. Mimal taimakah a innghat vek a ni. Pawimawh ber zawk chu nun hman chhung hian mahni hma zawnna tih tur awm te chu hel kual loa hmachhawn mai a tha bera, ‘short cut’ a awm lo tih hriat a tha ang.