Mizoramah sawrkar thar a lo dinin hmalak tum dan hrang hrang an nei thin a, sawrkar hmasa thil lo tih chhunzawm tlak nia an hriat te chhunzawmin thenkhat chu ram tan tha lo nia an hriat vangin an ti tawp thin bawk.

Sawrkar kalta MNF ministry pawh khan Congress sawrkar hmalakna thenkhat chhunzawmin thenkhat chu an ti tawp a. Chungzingah chuan zu zawrh tih tawp chu a langsar ber a ni a. Hei mai bakah Congress sawrkarin Falkawn khuaa damdawi in, Mizorama medical college hmasa ber hming atana Mizoram Institute of Medical Education & Research (MIMER) tih a lo phuah chu Zoram Medical College tiin a thlak a ni.

Zoram Medical College (ZMC) hi Mizoram state ta a niin MBBS zirna seat awmah pawh Mizoram chuan quota a ngah hle. Tunhnaia ZPM kaihhruai sawrkar a lo pian khan thutlukna dang rawn siam ve lehin ZMC leh Lengpui airport chu state sawrkar tan enkawl a hautak avangin midang kuta hlan a tum thu an puang anih kha.

ZMC sawrkar laipui kuta hlan chungchangah tunhnai khan Health Minister chuan sawrkar laipui a dawr a. Mahse Union Health Minister Mansukh Mandavya chuan ZMC chungchangah hian Mizoram sawrkar chu tha taka thawhpui a inhuam thu sawiin, state sawrkarin an kalpui chhunzawm theih nan a bik taka puihna 'special package' pek an nih tur thuin a lo chhang a ni. Hemi awmzia chu central hian ZMC hi an kuta hlan lova state kuta awmtir chhunzawm a duh tihna a ni.

ZMC a ni emaw Lengpui tum­hmun pawh nise midang kuta hlan/pek chungchangah hian ngaihdan a inang lo thei hle awm e. Zoram Medical College hi central kutah hlan ta ila chuan tuna Mizoramin MBBS quota kan neih thin (state reservation policy) hi a bo nghal dawn tihna a ni a, Mizoram mi leh sa Doctor zir chak tak tak ten an zir thei dawn lo tihna a ni. India ram medical college lut tur chuan kan thalai ten All India exam an hmachhawn a ngai tawh dawn tihna a ni a, state dang hmasawn tawh tak tak te nen inel ralah chuan kan la hniam deuh a rinawm a. Chuvangin MBBS chhuak thar hi kan nei khat viau ang tih a hlauhawm hle.

Tunhnaia Health Minister in sawrkar laipui a dawrna a Union Health Minister lo sawihmuh special package hmang hian ZMC hi a kal chho zel thei turah ngai ila, harsatna a tawk anih pawhin central chuan a tlakchhiat a phal dawn lova, a ngaihthah chuang lo ang. Chuvangin tun dinhmunah chuan kan state tan hian ZMC hi state sawrkar kuta a awm hi a tha ber niin a lang e.