Home Minister K.Sapdanga chuan tun hnaia an party office-a thu a sawi naah Police tiang keng chi (MRP) 150 leh silai keng chi (Armed Police) 200, a vaiin mi 350 an la leh dawn tih a sawi a. Hei bakah hian Police hi kum hmasaa fair taka an lak ang khan an la leh dawn tih sawi bawkin insawipui a tangkai dawn lo a, duhsak zawng nei chuan exercise lak lamah lo tanpui tur a ni tiin pressure vang ngawt chuan tlin a harsa dawn tih a sawi bawk. Hetiang deuh hlek hian Land Revenue & Settlement Minister B.Lalchhanzova chuan a department chan hmalakna thenkhat Press mite a hrilhnaah mitinin rualkhai taka sawrkar an chhawr theih nan e-rama process zawng zawng chu first come first serve tura ruahman a ni a, duhsak zawng leh thil dang avanga hmanhmawh bikte lo tih hmasak theih a ni lo tih a sawi bawk.

Hun kal tawh han thlir let ila Police lakna ah a ni emaw hna ruak dang hnawh khah chungchangah a tling leh thiam aiin sawipuitu nei tha, chhung leh khat, party mi leh sa lak an ni fo thin. Mi thenkhat phei chuan 'party office paltlang a har ber' an lo ti hial thin. Kan ram venghimtu leh min thlamuantu tura ngaih Police zingah ruihhlo laka fihlim lo te, nun thlahdah leh mipui rin hlawh lo lak an awm fo tawh awm e. Engpawhnise tunah chuan langtlang leh induhsakna bik awm lovin Police lak tum a ni hi thil lawmawm tak a ni. Induhsakna a nasat thin avangin sawrkar hnalak hrang hrangah thalai lehkhathiamte an beidawng fo thin, hetia Home Minister in fair taka lak tum a ni tih a sawi hian Zoram mipuiah beiseina sang tak a neih tir ngei ang.

Land Revenue & Settlement department pawh hi mipui ngheng leh dawr tam an ni a, siamthat ngai pawh engemaw zat a awm turah ngai ila. Hetia Minister in hma an la leh hmelthar hmuh tir tuma tan a la hi a lawmawm a, a hlawhtlin ngei pawh a rinawm. Zep nak emaw hun hmasa lamah kha chuan inhmun teh tur a ni emaw LSC thar siam tur pawhin hun rei tak tak nghah a ngai thin a. Mipui ten thawktute kan intlawn siak hial a, Surveyor hruai tur ringawt pawhin sum engemaw zat sen a ngai thin a nih kha. Hetiang hi anih thin avangin mipui zingah pawh beidawng hial te an awm a, chutih laiin hmelhriat nei tha leh thil ti thei deuh erawh chuan an ti zung zung thin. Tunah erawh Minister sawi anga department hi a kal chuan mipui pawhin beiseina thar an nei leh ngei ang.

Engpawhnise Minister pahnihte thusawi hi a lawmawm in a thlamuan thlak tak zet a. Chutih rualin Minister te chu policy kengtu an ni a, a taka ti hlawhtlingtu tur tak tak chu sawrkar hnathawkte an nih avangin department thawktute an pawimawh hle. Hma thar lak dawn chuan kal pelh ngai thil har tak tak engemaw zat a awm ngei dawn a, heng te hi huai taka sut zel a ngai ang. Mipui lam pawhin mawhphurhna kan nei a, eng anga dik leh felin sawrkar lam hian tih tum mahse a fel lo zawnga thil lo tih tir phet ang chi hi chu ti lo hram ang u. Minister pahnihte thusawi hi mipuiin an chhinchhiah tlat dawn a, an sawi ang ngei hian rinngam ngei turin hma han la ngei teh se.