Zirtawpni khan Raj Bhavan tualah Zoram Peoples Movement party, Chief Minister Lalduhoma kaihhruai Mizoram sawrkar thar lak luh a ni ta a. Sawrkarna siam turin MLA pawh an ngah tawk a, chak tak leh mitmei ven tur awm lova Ministry nghet anih dawn avangin mipui pawhin beisei an nei sang hle dawn a ni.

Sawrkar thar lakluh zawhah Chief Minister chuan chanchinbumite kawmin ni 100 chhunga sawrkarin a ngaih pawimawh tur te a puang a. Sawrkar chu leiba a ngah tih sawiin inrenchemna lam kalpui nat a tum thu leh amah leh a Minister te chu hmahruaitu a tan an tum thu a sawi a, hetianga sawrkar hi a kal thei anih ngat chuan mipui fak a hlawh dawn a. An thutiam te hi an ti hlawhtling anih ngat chuan inthlan dawna campaign hah ngai lovin mipui pawhin anmahni ah rinna nghatin sawrkarna an chantir leh ngei a rinawm.

Hun kal tawh thlir kirin Ministry hrang hrang hian ngaih pawimawh leh hmachhawp tha tak tak an nei thin a. Chief Minister leh Minister ten tih hlawhtlin tum thin mahse harsatna an tawh lian tak chu mipui, a bikin party workers te an ni. Zep nak emaw tun tumah pawh hian ZPM hi la sawrkar ngai lo, party worker te pawh sawrkar chak ngawih ngawih an ni a. Sawrkar an chak chhan pawh contract eng ilo thawh ve a ni.

Chief Minister thar chuan chanchinbumite a kawmna ah 'ZPM hnuaia hnathawh chu a tha tur a ni,' a ti a. Hei hi a taka tih hlawhtlin ni thei se a duhawm hle. Kan hriat angin party worker ten hna tha vak lo an thawh a, department lamin an pawm loh a awm pawhin party worker te hi Minister leh thuneitu sang lamah zualko in an bill pek an ni fo tawh thin a ni. Hei mai bakah Minister chhungkhat laina leh thian tha te hi a ti mualphotu an ni duh khawp mai bawk. Heng kawngah pawh hian Ministry hi an inven thiam hle a pawimawh a, hemi kawngah hian dik taka an kal ngei mipui hian an beisei ang.

Mipui ten ZPM an thlantlin chhan ber nia lang chu 'Kalphung thar, mipui sawrkar' din an tum vang leh eirukna lakah fihlim an tiam vang hi a ni. Hetiang taka Ministry hi a awm anih chuan mipui fak a hlawh dawn a, chutih rual chiah chuan an awm lo anih erawh chuan mipui chuan rorel zui zel tlakah an ngai dawn lo thung. Tun dinhmunah chuan sawrkar thar hian dik leh tha taka ram kaihhruai a tum niin a lang a, a ti hlawhtling tura mipui lam pawhin kan tawiawm hi kan bat ve a ni tih hrethar ang u.