India ram democracy innghahna hi lungthu pathum Legislative, Executive leh Judiciary te a ni a. Legislative hna thawk tur hian mipui ten kan aiawh tur kan thlang a, chung kan thlan chhuahte chuan dan siam leh thil pawimawh dang te an thawk a. Executive chuan Legislative dan siam lo kenkawh chu an hna pui ber a niin Judiciary chuan dik taka mipui ten rorelna an hmuh theihna atan an thawk thin a ni.

Kan aiawha dan siam tura kan thlan chhuah zingah hian MP, MLA, MDC, Local Council, Village Council leh a dangte an awm a. Dan naranin heng kan aiawh turte hi kum nga atan thlan thin an ni a, Rajya Sabha MP tur erawh direct-a mipui ten thlang lovin kan aiawha thlan chhuah MLA ten an thlang a, an term pawh kum 6 a ni bik a ni. India ramah state a mipui awm tam dan a zirin MP hi kan intam hleih hle mai a, Mizoram chu mihring kan tlem avangin Lok Sabha leh Rajya Sabha-ah pawh MP pakhat ve ve chauh kan nei thei a ni. Kan MP neih tawhte hi sawisel bo chu an ni bik lo, mahse an hnathawh leh thlen chinah chuan mipui ten an fak viau zel a, thil lawmawm tak a ni.

Mizoram aiawha India ram rorelna in sang bera thu kan MP te hi pakhat ve ve chauh an nih avangin mipui hriat pawh an hlawh bik a, an lakah pawh mipui ten beiseina kan nei sang bik a ni. Tun hma deuh kha chuan mipui ten kan lo hriat danin Parliament-ah pawh a duh duhin thu an sawi thei lova, party MP neih tam dan a zirin an aiawha thusawi tur pawh an in ruat thin niin an sawi. Mahse tun hnai hun engemaw ti kalta atang khan Mizoram MP ten an vei leh ngaimawh zawngte rorelna in sang berah hian an au chhuahpui ta fo mai a, zawhna pawh engemaw zat an zawt tawh bawk. Hei hi tun hmaa mipui ten kan lo hriat ang thin kha a ni lo tihna emaw a kalphung hi an ti danglam tihna emaw a ni thei ang.

Mizoram MP neih zinga pakhat zawk Rajya Sabha MP ni mek K.Vanlalvena hun chu vawiin hian a lo tawp dawn ta a, naktuk maiah MP thar K.Laltluangkima chu lakluh a ni dawn a. Mizoram MP kan neih pahnih Lok Sabha leh Rajya Sabha MP te chu Mizorama rorel mek party atanga thlan chhuahte an nih avangin sawrkar tha chakna nen mipui ten an lakah beiseina an nei sang hle. Parliament-ah hian thu mai mai tur ni lovin kan hnam leh sakhua tana huaisen taka ding ngam MP mipui ten an beisei a ni tih an hriat thar leh a pawimawh hle.