India rama sawrkar hna lian leh pawimawh zawng zawng la tu chu Union Public Service Commission (UPSC) a ni a, tlema hna hniam deuh zawk la thin tu chu Staff Selection Commission (SSC) an ni thung. Hetiang deuh hian Mizoramah pawh hna sang la tu atan Mizoram Public Service Commission (MPSC) an awm a, hna hniam deuh zawk la tu atan Mizoram Subordinate Services Selection Board (MSSSB) an awm thin a, mahse Mizoram sawrkar chuan ni 29.02.2024 atang khan a ti tawp a. Mi tam tak chuan MSSSB tihtawp a ni hi an ui hle a. Chutih rual chuan chief minister Lalduhoma chuan MSSSB awm reng chu tha an tih loh thu leh Mizoram Public Service Commission chu thuam chak an tum thu a sawi thung.

Mizoram Public Service Commission hi kan hriat angin hna sang la thin an ni a, MSSSB thiah anih tsakah chuan an hna khawih thin zawng zawng kha an kutah a awm ta a. Staff indaihlohna emaw harsatna dang an neih hriat a nih lem loh laiin tun hnaiah tihsual an nei fo mai hi a pawi hle a, an insiam that vat loh chuan mipui hmuh dan hi a dang daih ang tih a hlauhawm hle. Tun hnai maiah pawh Junior Grade of Mizoram Engineering Service (Combined Competitive) Exam 2025 result tih chhuahah tihsual palh an nei a, thupha pawh an chawi hial anih kha. Mizo Zirlai Pawl (MZP) te sawi danin Mizoram Animal Husbandry and Veterinary Service (MAHVS) junior grade tur hna lakna Mizoram Public Service Commission (MPSC)-in a buaipuiah thil fel lo a awm ngeia an hriat thu chanchinbumite hmaah an sawi a, he hna lakna hi a bul atanga ti tha leh turin an phut bawk a ni. Tun hnai maiah pawh department pakhata hnalak turah engemaw rokhawlhna avangin thulh anih thu MPSC lam hian an sawi bawk.

Heng bakah hian engemaw sawi neuh neuh a awm avangin MPSC vei tu an tam chho hle a. Mizo Zirlai Pawl hruaitute pawh an office-ah lengin hnalak chungchang hi an sawipui a. National Students Union of India hruaitute pawhin an office-ah kal chilhin thil awmdan an zawt chiang bawk a ni. Tunhnaia MPSC in tihsual a nei zauh zauh nia lang hi eng nge a chhan ber tih chiang taka chhui a, a damdawi dik tak chawh a hun ta hle. MPSC ah hian staff te hotu ber atan Secretary dah a ni thin a, hun engemaw chen post ruak a ni ringawt mai te kha an tihsual chhan a ni thei em? Hei mai bakah full commission lova dah reng mai te hi a fel lo hle bawk. Sawrkar hian kan rama hna pawimawh zawng zawng la tu Mizoram Public Service Commission hi a ngaihven a tul tak zet. Tun ang zela Mizoram Public Service Commission hi a kal chuan mipui ten rinngam har an ti mai ang tih a hlauhawm a, in siamtha thuai teh se.