Khawvel ram changkang leh changkang lo tehna ber chu an sum thawhchhuah leh mipui hriselna atangin a ni. Ram changkang zawk chuan an mipuite hriselna dinhmun an ngai pawimawh a, a thlawna enkawlna pe pawh thahnem tak an awm. Hriselna dinhmun a thatna hmun leh sawrkarin a ngaihtuahna hmun chu ram nuam leh changkang a ni deuh zel.

Mizoramah pawh sawrkar kalta leh sawrkar mek ten mipui hriselna atan hma an la a. Congress an ni emaw MNF an ni emaw tuna rorel lai mek ZPM sawrkar pawhin mipuite hriselna chungchangah an theih tawpin hma an la chho vek a, chutih rual erawh chuan an tih theih tawk leh an hun laia hmalak dan erawh a inang lo hle thung. Engpawhnise an vai hian theihtawp erawh an chhuah tlang vek tih a hriat a, a lawmawm hle.

Tuna rorel mek ZPM hian an sawrkar hma atangin health care scheme thar ruahman an tum thu sawiin an sawrkar hnuah Mizoram Universal Health Care Scheme (MUHCS) an kalpui ta a, hei hian fak leh sel a hlawh hle a, hahipa fak an awm laiin sawisel pawl pawh an awm ve reng tho. MUHCS hi damlo tam takin an chhawr tangkai a, chutih lai chuan inziah luhna man erawh a tam hle a, hei hi mi tam tak chuan an tlin lo thung. Inziah luh man hi tihniam leh thei se a duhawm hle.

Tun dinhmuna MUHCS a harsatna leh sawiselna lian ber nia lang chu sawrkar leh private damdawi in thawkho thei lo hi a ni a, inremna awm thei se a duhawm hle. Kan hriat angin MUHCS hnuaia inziak lutte chu a thlawna enkawl tur an nih laiin sawrkar, kohhran leh mimal enkawl damdawi in thenkhatah chauh a hman theih avangin damlo tam takin harsatna an tawk a. Khum indaih loh vangin loh theih loha private damdawi in pan a ngai a, mahse natna khirh leh engemaw bikah lo chuan senso hmuh let theih a ni si lo a. Damloh miau chuan damdawi in pan loh theih a ni si lo a, mi hausa zawk te tan harsatna a thlen leh loh laiin mirethei tan erawh phurrit lian tak a ni thung. Hei mai bakah damlo refer chungchangah pawh a khirh lutuk deuh em ni aw tih mai a awl hle.

Kawng lehlama thlir chuan MUHCS hi damlo tam takin an hlawkpui a, a tha tak zet a ni. Sawrkar pawhin a that thu leh mipuite chu inziaklut turin a ngen a, hetih laia a hmahruaitu tura ngaih kan Minister leh MLA te MUHCS a inziak lut loa private damdawi ina an inenkawlna senso zawng zawng an bill thei bik erawh hi chuan mipui beng a ti thlep deuh niin a lang.