Mizo Zirlai Pawl (MZP) leh Zo Re-Unification Organisation (ZORO) huaihawtin Zirtawpni kalta khan Vanapa Hall kawtah sawrkar laipuiin Myanmar nen kan inrina hung (Indo-Myanmar border fencing) siam a tum duh loh lantirna hun an hmang a. Ramri hung tur hi Zofate inkara daidanna bang nia sawiin tuna an hmalakna hian awmzia a nei lo a nih chuan ramri hung tura India sawrkar hmalakna chu a tawp thlengin MZP leh ZORO chuan a dodal zel dawn tih an sawi bawk a ni.

Kan hriat angin Mizoram hian khawvel ram dang pahnih Myanmar leh Bangladesh te a ri a, khawthlang lama ramri Bangladesh chu hung a ni tawhin helai ramri hung kawngah hi chuan harsatna leh dodalna a awm lem lo a. Khaw chhak lam hung a tum erawh pawl leh mi tam takin an duh lo thung a, hei hi a chhan ber nia lang chu khawchhak lam Myanmar-ah hian kan unau Zohnahthlak tam tak an awm a. Ramri hi hung anih chuan tuna awlsam taka kan inkalpawh ang hi chuan inkalpawh theih a ni tawh dawn lo a, hei hian harsatna a siam dawn a ni.

Hnam lian zawkte ngaihtuaha hnam tlemte Zohnahthlak te hi India, Myanmar leh Bangladesh-ah te thendarhin kan awm a. Heng ram dang pahnih zingah hian Myanmar lamah hian Zohnahthlak hi an awm tam hle a, kan inkalpawh nasa leh zual a. A bikin ramri hnaiha chengte phei chu inneih pawlh pawh an tam hle. Ramri hi hung ni se la chuan tun anga zalen hian kan inkalpawh thei dawn lo a, hei hian kan in unauna kawngah pawh nasa takin a nghawng ngei dawn tih a chiang a. Hei tak hi zirlai pawl leh ZORO te hian hriain an dodal pawh hi an thlirna atang chuan thil awm tak a ni.

Chutih rual chuan sawrkar laipui thlirna pawh hi an tarmit atanga thlirpui chuan a dik ve reng mai a. Myanmar-ah hian sawrkar a mumal lo em em mai a, ralthuam tawlhruk leh ruihhlo lo luhna hmun pawh a ni. Ramri hi hung ni ta se chuan heng ralthuam leh ruihhlo lut thin hi a rem vek chuang lo ang a, mahse a ziaawm ngei erawh a rinawm a ni. Mizo mipuite pawh hian khaw chhak lam hi ruihhlo lo luhna a ni tih kan hriat avangin mipui zingah pawh ramri hung hi thlawp engemaw zat an awm niin a lang.

Engpawhnise ramri hung chungchang hi chu sawrkar laipui thuneihna anih miau avangin an tum luih tlat chuan eng ang pawhin dodal mah ila an tih tlang tho tho a rinawm a. Chuvangin ramri hung vanga harsatna thleng thei hmachhawn tura keimahni lam inbuatsaih lawk hi a finthlak zawkin a rinawm e.