Tun hnai khan ICT department chuan sawrkar leh zirna in website hmang tha thlanchhuahte hnenah lawmman an hlan a. He award hlanna huna khuallian ICT Minister Dr. Vanlalthlana chuan hetianga website tha an thlanchhuah chhan chu inelna thianghlim a awm theih nan leh langtlang sawrkar a awm theihna tur niin a sawi a. Minister sawi ang ngei hian sawrkar department leh zirna in hrang hrangte hi kal zel thei se a duhawm hle.

Kan hriat angin hmasawnna thang zelah mipui ten online service kan hmang nasa telh telh a. Tun hma lama tui, electric leh phone bill pe tura thui tak tak kan intlar ang te kha ngai tawh lovin tunah chuan kan mobile phone kal tlangin kan pe thei ta a. Chutiang zelin eirawngbawlna gas la tura agent a kal thin leh an hnen ngeia va report ang chi te kha a bo tawhin tunah chuan mahni inlum ngeiah gas pawh an rawn thlen (deliver) thei ta, hmasawnna a thang nasa hle.

Hetia hmasawnna nasa taka a than chhoh tak avang hian mitin tunlai thiamna hmang tangkai tura kan in chher chhoh deuh deuh a pawimawh hle a, hmasawnna nena kal thiam lo chu kan buai chho zel dawn tihna a ni. Thalai zingah phei chuan IT lam thiam lo nih chu thil zahthlak a tling ta hial mai. Hetiang a nih chhoh mek avang hian sawrkar lam pawh nasa taka mipui mamawh hrang hrang pe tur hian an in herrem chhoh zel a pawimawh a. Online service hrang hrang pawh an tih changtlun chhoh deuh deuh a pawimawh hle.

Tun hma lam kha chuan sawrkar hmalakna leh hmachhawp, sum hman tur leh hman tawh zat bakah thil hrang hrang kha a changtu leh buaipuitu mi tlemte chauhin an hre thin a. Project an thawh pawhin sum eng zat nge hman tura sanction a nih a, eng zat chiah nge hman anih tak tih pawh mipui ten kan hre thin lo. Tunah erawh chuan engkim hriat theih a ni ta a, hei hian hlemhletna leh dik lo taka sum kal tur nasa takin a veng a ni.

Sawrkar laipui chuan mipui ten sawrkar hmalakna leh thiltih an hriat theih nan Right to Information Act hmangin engemaw tih bik tih lohah chuan mipui ten an duh leh mamawh an hriat theih nan zawhna an zawh a phalsak a. Mi tam takin an chhawr tangkai a, chutih rualin sawrkar hnathawk thenkhat chuan anmahni tih mualpho tumna emaw tia lo dawngsawng tha duh lo te an awm a, a pawi hle. Sawrkar hian online service tha zawk pe tura tan a lak deuh deuh a pawimawh hle a, mipui lam pawhin tun ai hian chhawr tangkai zel ila, sum leh tha tam tak kan hum thei dawn a ni.