Mizote hi hnam dang ngaihtuah chuan kan laa tlem hle mai a. Covid-19 vangin chhiarpui neih hun tur kum 2021-ah chhiarpui neih theih a ni lo a, eng zat chiah nge kan nih hre lo mah ila Mizorama cheng Mizo bik hi chu nuai 12 vel emaw kan ni turah ngai ila. Kan chhehvel hnam dangte ngaihtuah chuan kan la tlem hle a ni.

Tun hnai maiah kan khawpui ber Aizawl chu rel in tlawhpawh theih a ni ta a, rel service hi mumal taka a kal chhoh zel chuan nitin kan ramah hnam dang za tel an rawn lut dawn tihna a ni. Chung hnam dang lo lutte chuan kan ram ruak te hi an it ngei dawn ta, tam tak chuan inbenbel an tum ngei pawh a rinawm. Kan ram han en ila, ram ruak a la tam em em mai bawk si a. Hei mai bakah mi taima tan chuan thawh tur a la tam em em bawk. Chuvangin hnam dang ten heng kan ram ruakte hi an luah mai loh nan pian pun kan ngai hle.

Tun hnai hun engemaw chen atang khan naupiang an tlahniam chho hle mai a, mithiamte chuan hetiang zela Mizote hi kan kal anih chuan hnam ral tur kan la ni mai dawnin an hria a ni. Piang kan tlem lai hian thi kan tam em em mai a, thi zingah lah thalai thi an tam leh zual. Thihna thleng zingah ruihhlo kaihhnawiha thi kan la tam leh zelte hi a pawi tak zet.

Piang kan tlem chhan chi hrang hrang a awm ngei ang a, chung zingah chuan family/birth control kan kalpui that vang te, thalaite zingah nupui/pasal nei duh lo leh mamawh lo nia in hria an pun vang te, nupui/pasal kan inneih tlai vanga fa neih theih hun a tawi vang te, eizawnna mumal lo vanga innei ngam lo pun vang te, innei zingah pawh fa neih tam duh loh vang leh chhungkaw rual chu inluah turah harsatna an tawh vangte ni berin a lang. Heng chhan hrang hrangte hi chhuanlam awm tak vek anih rualin fa neih hi Pathian malsawm dawnna anih vangin leh Kristiante chuan kan tih tur anih angin pian tam hi kan mamawh tak zet.

Mizote kan pun theihna atan sawrkar leh kohhran pawhin tun hnai hun engemaw chen atang khan hma a la leh a, a lawmawmin hei hi nasa zawka chhunzawm zel a pawimawh hle. Presbyterian kohhran phei chuan Nilai zan thupuiah an nei ta hial mai. Tun ang renga kan kal chuan nakin lawkah kan ram hi hnamdang ten min luah sak ngei dawn tih a chiang a, chuvangin piang kan pun lehzual nan mitin ten tan la thar teh ang u.