Mizorama tlawmngai pawl lian ber Central Young Mizo Association leh kawng siamtu Public Works Department, Mizoram chuan a tum thumna atan Mizoram kawngpui a lo that zawkna atan thawhhona thuthlung an ziak thar leh a. He thawhhona (MoU) hi a tum khatna atan June ni 14,2018 khan ziah a niin a tum hnihna atan July ni 14,2022 khan ziah leh a ni a. Tun tumah hian a tum thumna atan Zirtawpni chawhnu dar 2 khan Engineer-in-Chief, PWD Conference Hall, Tuikhuahtlang ah an ziak leh a ni.

Mizoram kawngte hi siam zawh hlim chuan tlan a nuamin a tha thawkhat hle niin a lang a, mahse fur a tawrh meuh hi chuan engemaw lai chhia hi a awm nghal deuh zel a. Heng a chhe hmasa te hi siam nghal zel a nih loh chuan kawng in a tuar a, a hnu lawkah tlan harsa khawpin a lo chhe ta thin a ni. Kan kawng siamte a chhiat hma chhan hi sawi tur hrang hrang awm mahse a siam a fuh tawk loh vang leh enkawl that a nih loh vang ni berin a lang a. Hmun tam taka kawng siamah chuan hmanraw tha tawk lo, lung no leh a chawhpawlh dan dik lo te a awm thin.

Tun hnai maia Ramhlun kawngpui siam pawh hi a chhe hma hle a, hetia a chhiat hma chhan hi a hun lova siam anih vang niin a lang. Kan hriat angin kawng siamna atana kan hman lar alkatra hian tui a duh lo em em mai a, mahse Ramhlun kawng siamah hian ruah tui tlak hnuah hnathawh a ni a. Chumai bakah kawng siamna atana hmanraw chawhpawlh pawh an phurhna a hla in a dai hman a, a inchar tha thei lo nia sawi a ni. Chuvangin kawng hian a tuar ta niin a lang a, a pawi hle.

Mizoram PWD leh Central YMA thawhhona turah hian PWD hnathawhna tur huam chhunga YMA Branch/ Group leh Sub. Hqrs. hruaitute chuan hnathawh laiin, hun remchangah PWD leh YMA hruaitu ten joint inspection an nei thin dawn a ni. Hei mai bakah hian hna tha lo a awm chuan YMA-in a mal a hma la mai lovin, bialtu EE/SDO te nen sawiho a nih hnuah department-in Contractor te chu hmalak dan tur an hrilh thin dawn a ni.

YMA leh PWD te an thawkho leh tur hi a lawmawm tak zet a, a chhan chu Mizoram hmun tam berah YMA hian member an nei a. Hmun hrang hranga kawng siamte an lo vilpui thei tur hi a lawmawm lehzualna tur a ni. Kan rama kawng siamtu contractor te hi a tam ber chu state pawna mite an ni a, hlep pawh a tam thei ang ber neih an tum dawn avangin an kawng siam pawh awlsam leh senso tlem thei ang bera thawh an tum ngeiin a rinawm. Mahse YMA ten an vilpui chuan hmanraw tha lo hman kawngah leh kawng siam dan turah pawh contractor ten an duh ang anga an tih kha a rem dawn lo tihna a ni. CYMA leh Mizoram PWD ten thawhhona an siam hi a lawmawm a, a nihna ang taka khawi lam ve ve pawhin an kenkawh chuan kan kawngpuite a tlo phah ngei a beiseiawm e.