Mizoram sawrkar hnuaia lirthei lama thuneitu sang State Transport Authority chuan Mizoram chhunga passenger phur chi lirthei-a chuang thin ten sawrkar rate dik tak an chawi theihna atan Mizotaxi mobile app a duang a. Aizawl khawpui chhungah chuan 'Mizotaxi' app hi July ni 1, 2026 atanga hman tan tur a niin 4-wheeler taxi te, 2-wheeler taxi leh Autorickshaw zawng zawng hman tura ruahman a ni. Hemi hmang tur hian Mizotaxi application hi playstore/appstore ah download tur a ni.

Mizo taxi app hman tum hi lirtheia eizawng pawl pathum Mizoram Taxi Association, Aizawl Two Wheeler Taxi Association leh Aizawl District Auto Rickshaw Owners Association te chuan duh lovin sawrkarin rate hman tir a tum chu kum 2024 rate anih thu leh hei hian lirtheia eizawngte mai bakah mipui tan pawh harsatna a thlen dawn niin an sawi a. Hemi chungchangah hman loh anih theih nan theihtawp chhuah an tum thu leh a tawp thlenga dodal an tum thu an sawi a, he app a inziak lut pawh an la tam lo hle nia hriat a ni.

Sawrkar tha chuan mipui tan a thawk thin a, dik tak leh mipui hmakhaw ngaia sawrkarin hna a thawhna hmun chu ram nuam a ni zel a ni. Tun tuma taxi app pawh hi mipui ten sawrkar rate bituk dik tak hmanga lirthei chuan man an pek theihna atana duan a ni a, Aizawl khawpuiah bultan phawt tur a niin a tahtawlin district dangah pawh la kalpui zel tura ruahman a ni. Phai lama zin thin ten lirthei an chuan changa an complaint tam ber chu fare dik lo tak an chawi thin hi a ni. India ram khawpui tam taka taxi leh rickshaw khalhtute hi rinawm tam tak awm mahse rinawm lo tak tak, rate dik loa chawitir an tam thin hle. Hei vang hian khualzin tam zawk chuan rate dik tak hmanga tlan thin Uber leh a dangte an ko thin.

Mizoram pawh hi ngun takin han thlir ila, kan driver zingah hian rinawm tak tak an awm laiin rate dik lo leh uchuak taka chuan man la an awm thin. Sawrkar chuan kawng hrang hranga a thlir hnuah mipui leh lirthei neitute tana harsatna awm lo thei ang ber turin rate hi a bithlaih thin a, mahse tuna sawrkar rate bithliah anga tlan char char hi eng zat tak awm ang maw? July ni 1 atanga hman tan tura a ruahman taxi app thar pawh hi rate dik zawk mipui ten an pek theihna atana tih a ni. A dik tak chuan taxi khalha eizawng zingah rinawm tak tak an awm laiin thenkhat hi chuan fare hi uchuak leh to zawkin an khawn ni pawhin a lang. Tuna sawrkarin ruahmanna a siam pawh hi taxi neitute hian han hmang phawt se, a tha lo anih chuan la siamthat leh theih ang. Hman hma hauh atanga lo dodal hi chu a kalphung lo deuhin a lang e.