Mizoram chhunga hmasawnna hnathawh tawh zinga lian ber leh vaibelchhe 8000 chuang senna ni bawk Bairabi-Sairang rel kawng chu Prime Minister chuan a hawng ta a. Sairang thleng kal tur rel a hawn rual hian Mizorama rel service thar pathum a vailiam bawk. Hetia kan khawpui Aizawl rel in a pawh thei ta hi thil lawmawm tak a ni a, hmarchhak bialah phei chuan state khawpui rel in a tlawh theih pali na a ni hial a ni. 

Chutih rual chuan thil reng reng hian a tha lam leh a tha lo lamin ken tel a nei vek a. Pawisa thirin hmai hnih a nei angin Sairang thleng rel kal hian a tha zawng leh a tha lo zawngin nghawng a nei ngei dawn a, chumi atan tak chuan kan lo in buatsaih lawk a pawimawh hle. Hmasawnna lawmawm tak hi kan chhawr thiam loh chuan kan ram leh hnam chimralna hmanrua a ni thei dawn a ni.

Kan hriat angin Mizote chu tun dinhmunah nuai 14 vel emaw lek kan la ni a, India ram mipui vaibelchhe tel engemaw zat lakah chuan uihum lek kan la ni. Hetia rel a service takah chuan ni tin mi za tel an rawn lut dawn, chung mite lo dawnsawn dan turah ruahmanna felfai tak kan neih a pawimawh hle. Tun dinhmuna kan ram himna leh chimral loha kan la awmna chhan pakhat chu Inner Line Permit (ILP) kan nei hi a ni. 

ILP hi khauh takin kan kengkawh emaw tih laiin dan leh thupek kengkawhtute bakah tlawmngai pawl ten hnamdang ILP an enfiah chuan mi thahnem tak thawn haw ngai an awm ziah. Rel hi dan pangngaia a service tak tak chuan Mizoram tlawh tumte laka ILP pekchhuah leh kenkawh kawngah sawrkar tun aia a tan leh zual a ngai dawn a, putrukna tur a tam dawn vangin a tul ang zela ILP check post a din belh pawh a ngai ngei ang. ILP chungchangah hian tlawmngai pawlte pawhin tun aia nasa lehzuala sawrkar an thawhpui a ngai.

Hei bakah hian rel service hian hna tam tak a siam dawn a, chu chu Mizo thalaite hian kan bawh a pawimawh hle. Hna sang leh hniam kan thawh theih ang angte kan zuan anih loh chuan chung hna thawktu tur chu hnamdang an ni dawn. Heng hnaruak awm ang angte hi kan thawh ve ngei theihna turin tan kan lak a pawimawh. Faina chungchangah pawh hmalak a pawimawh hle mai. 

Zep nak emaw India ram hi kan la tawp hle mai a, sawrkar laipuiin nasa takin hma la mahse phai lamah te chuan kawng sir leh rel kawng bula inthiar mai mai hmuh tur an la tam hle. Heng zinga mi tam tak hian Mizoram hi luh an rawn tum dawn a, chuvangin faina kawngah pawh tun atanga kan lo in hmakhua a, India rama rel station fai ber nih ngei tum ang u. Rel service hian thil tha tam tak a thlen dawn a, thil phurh man a tlawm dawn a, khualzin tan awlsamna a siam dawn bawk. Engpawhnise Sairang thleng rel a service tur hi a tha zawngin chhawr tangkai ngei i tum ang u.