Kan hriat angin Mizoram hi ruah tui dawng tam ram kan ni a, kum tin ruah sur nasa vangin leimin leh chhiatna hrang hrang kan hmachhawn thin a ni. Khawvel hmun tam takah chuan tui a harsat avangin an buai a, nakin lawkah chuan tui vang hian ram engemaw zat hi chu an la indo dawn niin mithiamte chuan an sawi a ni.

Mizoram hi ruah tui dawng tam ram kan ni chung hian a khawlkhawm emaw hman tangkai kawngah hma kan la tha lo hle mai a. Pathianin ruah tui tha tak mai min pek hi kan chhawr tangkai tawk loh avangin kan buai a, kawng thenkhatah chuan harsatna min thlentu a ni ta hial mai. Mithiamte chuan fur ruah tui hi a fimin a hrisel hle tih an sawi a, hei mai bakah sawrkar atanga kan dawn thin tui angin damdawi hmanga tih thianghlim ngai lo niin an sawi bawk. Mahse heti chung hian chhungkaw tam tak chuan khawl na chang kan hre lo a, tui sem kawngah eng emaw harsatna a awm changin kan buai leh hluai si a. Harsatna kan pumpelh theih tur pawh kan theih loh phah fo mai hi a pawi tak zet a ni.

Ruah tui khawl chu sawi loh kan luan tir dan pawh hi kan uluk a ngai khawp mai. Vanduai thlak takin kum tin mai ruah tui vangin leimin, lei tlahniam leh harsatna dang te kan tawk thin a. A chang phei chuan in chim, thiah ngai, luah chhunzawm ngam loh leh a dang engemaw zat a thleng thin a, heng harsatna tam tak hi chu pumpelh theih niin a lang. A dik tak chuan kan tuihawk luan dan te hi a mumal lo em em mai a, chhung tin hian kan in leh a velah hian tuihawk luanna tha tak nei vek ila chuan fur laia harsatna thleng tam tak hi chu kan pumpelh theih ngei a rinawm.

Tunlai hian Aizawl khawpui tuilakna kawngah PHE ten harsatna an tawk a, fur lai a ni chungin chhungkaw tam tak chuan harsatna kan tawk a ni. Fur ruah tui hi khawl na chang chu hria ila chuan chhungkaw tam tak hi chu kan buai lovin a rinawm a, tui hnianghnar kan neihna tur anih mai bakah sum tam tak kan khawl dawn tihna a ni bawk. In tha tak tak sa thei si, mahse ruah tui khawl tangkaina hre lo pawh kan la awm tlat mai te hi a zia lo hle.

Khawvel hmasawn zelah tuihna siamtu ramngaw kan ti chereu zel a, tuihna hi chu a tlem sawt sawt zel dawn a. Hei mai bakah Mizote chu hmun sang lama awm thin kan nih bawk avangin tui harsatna hi chu kan la hmachhawn zel dawn tih a hriat a, chuvangin Pathianin a thlawna min pek ruah tui khawlna chang kan hriat deuh deuh a pawimawh tak zet a ni. Sawrkar pawh hian in sakna permit a pek dawn hian ruah tui khawlna tha tak nei ngei tura tihna te hi zep tel thei hial se a duhawm hle.