Kan hriat angin Mizoram chu khawvela ruihhlo siamna hmun lian golden triangle atanga hnai tea awm a ni a. Hei mai ni lovin helai hmun kalpawhna kawnga awm Myanmar ramah sawrkar a mumal loh bawk si avangin khaw chhak lam atangin ruihhlo a lo lut nasa a, ruihhlo tam tak hi chu Mizoram kaltlanga hmun dangah thawn tur ni mahse thahnem tak chu tualchhunga hralh tur a ni. 

Heti tak maia ruihhlo in min chimbuai tak avang hian sawrkar, tlawmngai pawl leh kohhran ten a do hna theihtawpin an thawk a, mahse a sawt mawh hle. Sawrkar chuan ruihhlo lo luhna ber khawchhak lamah hma lain khawtlang nena tangrualin a lo lut tur tih rem tumin hma an la a, hei hian thui takin awmzia nei mahse engemaw zat chu a lo lut zel tho niin a lang. Eng angin ruihhlo lut tur hi tihtawp tum mah ila kan ram chhungah mamawh (demand) a awm chhung chuan tihtawp theih a ni dawn lo a, ram changkang leh thiltithei zawk USA ah te pawh nasa takin hma la thin mahse demand a awm tam miau avangin ruihhlo tawlhtu ten tihdan kawng an zawng zel thin.

Ruihhlo hian thingtlang kilkhawr ber thleng min luh chhuah tawh a, a ken tel tha lo leh pawi tak zinga mi chu HIV/AIDS hi a ni. Ruihhlo ti thinte zingah HIV a hluar bik a, ruihhlo ti thinte chu mipat hmeichhiatna hman kawngah an fimkhur tawk lo tlangpui a, hei mai bakah hriau inhman tawm te a lo awl bawk nen Mizoram chu India rama HIV sanna ber kan ni ta hial. Sawrkar, tlawmngai pawl leh kohhran ten ruihhlo tihrem tumin hma an la a, a lokalna ber khaw chhak lamah beihpui an thlak hnuah khaw chhak atanga lo lut thin ruihhlo pawh a tawmim phah hle a. Mahse heti chung hian kan thenawm Assam lamah ruihhlo hmuh tur a awlsam avangin ruihhlo ti thin mi engemaw zat chuan an pan leh dul dul si a, a buaithlakin a luhai thlak tak zet a ni.

Mizoram sawrkar pawhin ruihhlo ti thin ten an sim a, kawng dik an zawh nan theih­tawpa hma lain Hulhliap Short Stay Centre te an kalpui a. Ruihhlo ngai mi engemaw zat chu he camp ah hian luhtir an niin Pathiana harhtharna chan mai bakah ruihhlo an sim a, eizawnna kawng an zawh theihna turin thiamthil pawh zirtir an ni a. Sum tam tak sen a ni chungin awmzia awm tam lem lo niin a lang. Ruihhlo do kawngah hian enge kan sawtpui ber ang tih pawh hriatthiam a har ta hle. Tun dinhmunah chuan ruihhlo ngai te hi home/camp ah a tam thei ang ber khungkhawm a, a la ti ve lote venghim tura sawrkar, tlawmngai pawl leh kohhran ten theihtawpa hmalak hi ruihhlo do na atana thil tha ber a nih a rinawm e.