Mizoram hi kan hriat angin tlangram a ni a, hun rei tak chhung chu motor bak chuan tlawhpawh theih a ni lo. Hmasawnna a kal ve bek bek a, Lengpui tumhmun neiin zin veivah nan kan hmang tangkai hle a. Khawmual lamah pawh Bairabi thleng rel lutin hei hi zin veivahna atan hmang tangkai tawk lo mah ila buhfai leh nitin mamawh chawkluhna atan chuan tangkai taka hman a ni a. A hmaa truck in hmun hla tak tak atanga buhfai an phurh thin kha tunah chuan hmun hnai zawk atangin phurh a ni ta te hi thil lawmawm tak a ni.

Tunah chuan Bairabi mai ni lo Sairang thlengin rel kawng siam a ni a, kar leh mai September ni 13,2025-ah Prime Minister chuan a hawng dawn ta a. Ruahman dan chuan rel hi Mizoram chhim tawp thleng kaltir tum a ni. Sawrkarin ruahmanna a siam dan chuan Sairang-ah hian bungrua mai ni lo khualzin phur rel pawh tlan tir tum a ni a. Rel changkang pawh service thei hial tura beisei a ni.

Hmasawnna reng reng hian a tha lam leh tha lo lamin nghawng a nei ve ve a, a that lohna lam aiin mipuiten an chhawr tangkaini tur lam a nasat zawk chuan tawrhna awm thin mahse kal tlangpui thin a ni. Sairang thleng rel kawng siam pawh hian ramngaw tam tak a ti chhia a, mi tam tak in leh lo a ti chhia­in eizawnna kawngah pawh harsatna tawk mi engemaw zat an awm a ni. Mahse mipui ten an chhawr tangkai dawn miau avangin leh a thatna lam a tam zawk fe avangin sawrkar chuan hetiang hian ruahmanna a siam ta a ni a. Mizoram chhim tawp thleng a kal anih chuan rel kawng hian kan ram hi a phel phawk dawn tihna a ni a, side 'B' lam atanga thlir chuan a uiawm dawn hle a. Chutih rual chuan khawchhak ramte nen insumdawn tawnna kawngah Mizoram mai ni lo India ram laili thlenga kan chhawr tangkai dawn avangin siam ngei erawh a tha hle.

Sairang hi kan khawpui ber Aizawl atanga hnaite anih avangin hmarchhak state khawpuiah chuan rel in a tlawh theih 4-na a ni dawn a, thil chhinchhiah tlak tak leh tun hnu zel pawha kan ram chanchin (history) a chuang reng tawh tur a ni. Chutih rualin Sairang thleng rel service tur chungchangah pawh a tha zawng leh tha lo zawngin nghawng a nei ngei dawn a. A thatna lamah chuan bungraw tam zawk a lo lut thei dawn a, khualzin ten chhawr tangkaiin man tlawm zawkin an zin thei ang a, mi tam tak eizawnna a siamsak dawn bawk a. Ramin hma a sawn dawn bakah kan thil deuh chhuahte kan hralh nasat phah dawn bawk a ni.

Kawng lehlama thlir chuan hnamdang za tel nitin an rawn lut dawn tihna a ni a, mihring an tam chuan mi tha tam tak zingah misual engemaw zat an inphum ngei dawn a. Chuvangin sualna chi hrang hrang a pun phah ngei dawn bawk. Kan state in inhumhimna kan neih mek ILP (Inner Line Permit) pawh hi kan hmang reng thei ang em tih pawh hriat har tak a ni. Chuvangin hmasawnna lo thlen ruala a nghawng tha lo lo thleng thei lakah hian nasa taka kan lo in buatsaih a tul hle.