Kan hriat angin Mizote hi kan chhevel hnam dangte ngaihtuah chuan kan tlem hle a. Sumdawnna leh thildangah pawh kan chhehvel hnamdangte hnungah kan kal ve bek bek zel. Sumdawnna bikah phei chuan kan la hnufual leh zual a, mahse heti chung hian sumdawnna kawnga hnamdang thurualpui, hnam tana pawi tur ti duh kan la awm zel te hi a pawi tak zet. 

Mizo Zirlai Pawl (MZP) chuan Mizo hming hawha sumdawngte dap chhuak turin hma an la mek a. He­tiang deuh chiah hian tun hnai maiah pawh Central YMA in hma an la tawh anih kha. An hmalakna avangin Mizo hming hawha hnamdang sumdawng engemaw zat hmuhchhuah a ni a, mahse heng hnamdangte hian Mizo hming an hawh man hi pe in langsar takin an sumdawng ngam a. An hming hawhna Mizo ngei pawhin an dawr ni lo tih hriat ngawih ngawih pawh anmahni dawr anga sawi duh an awm thin. Chuvangin he thil hi tih tawp har tak niin a lang a, fimkhur tak leh dan hnuaiah ngun taka zirchian hnua hmalak chauh a finthlak dawn a ni.

Inchimral dan hi kawng hrang hrang mihring intam hneh, sumdawnna avanga inchimral, sakhuana vang, hnamdang tih dan lak nasat leh a dangte a awm thei awm e. Kan chhehvela hnamdang awmte han thlir ila a rama lo cheng hmasa Tripuri a ni emaw Cachari hote hi khawiah nge an awm tak? Hengho hi sumdawnna avangin chimralin an awm tih kan hre awm e. Hetiang deuh hian Meghalaya lamah pawh Khasi ho khuan economics a chimral an hmabak leh a tih theih awm e. Hetih karah hian Mizote hi chu chhan tlak kan la awm a, chutih rual erawh chuan hmalak vat a nih loh chuan dinhmun hlauhawm taka kan ding thei bawk.

Mizoram district khawpui hrang hrang han thlir ila, a bikin chhimlam district khawpuiah chuan hnamdang dawr a tamin sumdawnna hrang hrang hi an thunun ta vek emaw tih tur khawp a ni. Hetia hnamdangte an inbun ngheh tawh chuan tih tawp leh hi thil har tak a ni a, chuvangin sumdawn phalna pek kawngah pawh fimkhur tawp khawka tih a pawimawh. Mizoram Merchant Association (MIMA) hovin an chhinchhiah dan phei chuan Aizawla insakna bungrua, iron rod leh cement dawr awm zinga 80% lai hi hnamdang ta niin an sawi a. Dawr pawh hnamdang dawrkai ten an luah to ngamin a neitute chhiar aia to pawhin an luah ngam niin an sawi a, hetiang zela a kal chuan sumdawnna kawngah chim­ral kan la ni thuai dawn tihna a ni.

Tunah Sairang thleng rel a tlan ta a, sumdawnna bungrua pawh a hma aia tam leh zual a lo lut dawn tihna a ni. Sumdawnna kawngah hian Mizo mipui ten theihtawp chhuaha hma kan lak a ngai a, kan lo thlir mai mai anih chuan kan hnam hi chimralin kan awm mai ang tih a hlauhawm ta hle.