Mizoram sawrkar chuan mipui ten rate dik leh tlawm zawk mai bakah awm hmun atang pawha an duh hun huna taxi an koh theihna tur 'Mizotaxi' app a duang chhuak a, ruahman dan chuan July ni 1, 2026 atanga hman tan tur a ni. Mahse he app hnuaiah hian inziak lut an tam loh avangin duh angin a hlawhtling lo a, a la hlawhtling chho zel turah beisei ila. Sawrkar ruahmanna thar a hlawhtlin mai loh chhan hi mihring phur chi lirtheia eizawng pawl pathum Mizoram Taxi Association, Aizawl Two Wheeler Taxi Association leh Aizawl District Auto Rickshaw Owners Association ten an dodal vang leh High Court hial thlen an tum vang niin a lang.

Mizo taxi app hi sawrkarin a duan danah chuan mipui tana tha tur leh lirtheia eizawngte tan pawh hlawkna awm tho tura duan niin a lang a. Hei hi tih hlawhtlin ni ta se chuan mipui ten rate tlawm zawkin lirthei an hmang thei ang a, he application hmang hian lirthei an chah thei dawn bawk a ni. Chumai bakah lirthei nghah nana hun rei tak tak hun hman ngai awm thin a ti bo ang a, mahni chuanna lirthei hriat anih dawn avangin a him bakah thil thawn chungchangah pawh a him leh zual dawn a ni.

Mizoram hi hmarchhak bialah ringawt pawh taxi fare sanna ber a ni a. Driver fel tak tak, rate dik taka la thin an awm laiin thenkhat hi chuan rate bituk aia sangin an la thin nia sawi a awm a. Mipui lam pawh hian kan tih tur hi kan ti tawk lo a, rate dik loa tlan chu State Transport Authority lamah te thlenin STA hian han hrem hmak hmak mai se chuan rate dik hi kan hmang leh zualin a rinawm. Kan hriat angin tun hnaiah rel in kan khawpui a rawn tlawh tak avangin khualzin pawh nasa takin an pung a, heng khualzinte hian kan ram nuam an tih zia leh mawi an tih zia an sawi ruala an sawi tel deuh zel chu lirthei chuan/hman man sang lutuk hi a ni. State danga zin thin chuan an hria ang a, khawlai taxi ding hmang mai mai lovin rate dik tak chawi thinna taxi ola, uber etc. te an hmang thin a. Hetiang changkanna leh rate tlawm zawk chawi ve hi kan phu ve tawh hle.

Mizo taxi app a mipui chawi ve tur chungchang pawh hi ngun taka ngaihtuah a ngai a. Tunlaiah internet hmangin thawmhnaw leh thildang chi hrang hrang kan chah a, heng kan thil chahah hian tax kan chawi vek chungin dawr lama lei ai chuan a tlawm zawk avangin na kan ti lo. Chutiang deuh chiah chuan app hmanga taxi kan chahin tlem chawi awm mahse a hmaa kan hman thin ai chuan taxi hmangtute hian an chawi tlem zawk dawn a, chuvangin hei pawh hi sawi vul chiam a fuh lo deuhin a lang.

Engpawhnise sawrkar lam pawh hian taxi neitute hi dawhkan khat kilin an harsatna leh thilphut te hi pa chan chang takin sawipui thei se, eng emaw talin inremna hi awm thei se a duhawm hle. Taxi app pawh hi a tirah chuan a famkim kher lo mai thei, la siamthat zel theih a ni tih hriain hman phawt ni se a duhawm hle.