Mizoram Legislative Assembly budget session neih mekah bill siamthatna ‘The Mizo Marriage and Inheritance of Property (Amendment) Act, 2026’ chu pass a ni a. He bill pass tak hian sawi zui a hlawh hle a, a chhan ber nia lang chu bill sawihonaah chief minister in dan thar hman turah Mizo hmeichhia ten an tribal nihna an hloh tur thu a sawi hi a ni awm e. 

Assembly in dan a pass tak hi tlawmngai pawl Young Mizo Association leh zirlai pawl Mizo Zirlai Pawl chuan tha an tih thu an sawi a. Hetih lai hian an thawhpui Mizo Hmeichhe Insuihkhawm Pawl (MHIP) erawh chuan Mizo hmeichhia te tan a him loh leh a that tawk loh avangin ennawn leh ngei ni se an duh tih an sawi thung. He bill hi a thlawptu a zirin a thatna leh thatlohna pawh awm thei a ni a, chutih rual chuan a taka hman a la nih loh avangin eng nge a thlen dawn a la hriat loh bawk a. A that lohna a awm chuan la siamthat leh zel theih a ni.

YMA lam chuan dan thar pass tak chu Mizo hmeichhia in hnamdang pasala neih thatlohzia leh pawizia tarlanna tha tak a ni tiin lawmawm an tih thu an sawi a. An khawmpui thurel­ah pawh 'Mizo hmeichhia ten hnamdang pasala an neih zel loh nan Central YMA hian inzirtirna nasa zawkin kalpui rawh se’ tih rel alo nih bawk avangin hetianga hnam humhalhna leh himna tura Mizoram State Legislative Assembly in Bill a pass hi a lawmawm an ti tak zet tih an sawi a ni. MZP lam pawhin zirlaite zingah Mizo ngei nupui pasala nei turin hma an la tawh thin tih sawiin he dan hi an thlawp thu an sawi a ni.

Kawng lehlama ngaihtuah chuan Mizote hi hnam dangte ngaihtuah chuan hnam tlemte kan la ni a. Mipa an ni emaw hmeichhia pawh nise hnam dang ni lovin mahni chipuite ngei hi nei thei zel ila duhthusam a ni. Hemi kawngah hian Mizo mipa zingah hnam dang nupuia nei hi chu tlemte an ni a, chutih rual erawh chuan hmeichhe zingah chuan hnam dang pasal a nei an tam hle thung. Sawrkar, kohhran leh tlawmngai pawlten fa nei tam turin inzirtirna kalpui thin mahse fa nei tam duh kan tlem si a, kan vela hnam dang ngaihtuah chuan Mizote hi pung chak lo hle.

Chutih rual chuan kan khawhawi erawh kan tih zauh deuh deuh a pawimawh a. Kan khawvel hi a zim tawh a, khaw chhak leh khaw thlang nen kan inkalpawh zung zung thei ta. Hnam dang kan ramah an lut tam telh telh dawn a, hnam dang nupui/pasal nei pawh an pung chho deuh deuh ang. Hetih laia hnam dang pasal nei ten an fate tribal hamthatna neih tir tum an awm tlat thin hi a pawi a, hnam dang an neih tawh chuan an fate khan tribal hamthatna an nei thei tawh lo a ni tih hi chiang takin hre tel se a duhawm hle. Tun dinhmunah hi chuan tribal hamthatna leh chanvo kan duh anih chuan Mizo hmei­chhiate hian hnam dang hi chu nei lo thei hram se, chutih rual erawh chuan mipate pawh chhungkaw chawm thei tur leh hmeichhiate rinngama awm ve a pawimawh hle.