India ram nawmna em em pakhat chu mipui ten kan aiawha roreltu tur kan thlang thin hi a ni. A khat tawkin inthlan a awm deuh reng a, mipui ten kan aiawha roreltu tur kan thlang thin. Naktip maiah pawh Aizawl khawpuia roreltu tur Aizawl Municipal Corporation a kan aiawh tur corporator kan thlang leh dawn a, hei hi ngai pawimawha mipui ten vote kan thlak ngei a pawimawh hle.

Vote thlak hi a pawimawh em avangin vote a tlak that theihna turin thuneitu lam chuan theihtawpin tan an la thin a. Vote thlakna atana kan hman thin voters ID nei lo tan pawh anmahni ti chiangtu tur leh vote an thlak theih ngeina tur document hrang hrang an phal a. Hei mai ni lovin vote thlakna hmun pan thei lote pawh an awmna hmunah vote an thlak theihna turin home voting pawh a tul angin tih thin a ni bawk. Vote thlak turte tana awlsam zawkna atan polling station a an electoral roll serial number, vote thlak ni leh hun etc., awlsam taka an hriat zung zung theih nan 'Voter Information Slip' te pawh sem thin a ni a. Chumai bakah MPF lam chuan duty te an dah thin bawk.

Hei mai ni lovin vote thlak pawimawh zia inhrilhhriatna atan National voters day pawh hman thin a ni a. Kum 1998 atang khan thalai tam zawkin an aiawha roreltu tur an thlan theihna atan vote thlak thei tura kum bithliah kum 21 chu kum 18-ah tih hniam a ni bawk. Mizo mipuite hian a tlangpuiin vote kan thlak tha hle a, a bikin MLA inthlan hi kan ngai pawimawh ber niin a hriat a. A tlangpuiin MP inthlanah erawh vote a tla chhe deuh thin. Kan hriat angin naktip maiah kum nga chhunga Aizawl khawpuia roreltu tur corporator thlang turin mipui ten vote kan thlak leh dawn a ni. Mi tam tak rilru-ah AMC ngaih pawimawh lohna awm thei a ni a, vote thlak pawh ngai pawimawh lo awm theih a ni. 

Tarlan tawh angin vote thlak ngei hi khua leh tui tha mawhphurhna a ni a, kan duty a ni tih hre thar leh ila a tha hle. Tun tumah hian kan thlang sual anih chuan a tuartu tur chu mipuite kan ni a, kan thlan fuh erawh chuan a chhawrtu tur chu mipuite bawk kan ni. Kan vanneih bik em em na chu kan thenawm Myanmar leh hmun dangah te chuan inthlanna thianghlim a awm thei lo a, keini ramah erawh mipui ten zalen takin vote kan thlak thei a ni. Chuvangin AMC inthlan lo awm turah hian ngaihtuahna fim tak hmang chungin tute nge kan aiawha rorel tur hian tha ber ang tih ngaihtuah chungin vote hi thlak ngei ang u.