Aizawl February 3, 2024 : Hriat theih chinah tunah hian School Education department hnuaiah zirtirtu ai kal la mi 601 an awm mek.

ZALEN RTI zawhna an chhannaah School Education department-a State Public Information Officer chuan zirtirtuten ai kal an lak chhan hi chhungkaw harsatna leh damlohna vang a ni tlangpui tih a sawi.

Zawhna chhangin School Education SPIO chuan sawrkar kaltain term tawp dawn lama school 180-te provincialsed, 52 nos adhoc GiA leh 108 nos Lump sum GiA-a an hlan kaite a taka kalpui turin thla khat sum sen zat tur chu staff te absorbtion/screening a nih phawt loh chuan sawi fak theih a ni lo tiin thla khatah vaibelchhe 32.3 vel ngai tura ngaih a ni, a ti.

Dinhmun tha zawka school hlan kaite a taka hmuh theih hun tur chungchangah post creation buaipui mek a ni tiin a hun tak sawi theih a ni rih lo a. Provisional adhoc-a hlan kaite chu sawrkarin thu dang a neih loh chuan April 1, 2024-a effective hman tura buatsaih mek niin a sawi bawk.

SPIO chuan School Education department hnuaiah zirtirtu hna thawk mek mi 8,752 an awm tih sawiin hengte hi a ngheta thawk mi 5,162 leh a ngheta thawk lo mi 3,590 te an ni.

School hrang hrangah zirtirtu post ruak 4,123 a awm mek tih sawiin hengte hi Govt. HSS-ah 25, H/S-ah 718, M/S-ah 1,786, P/S-ah 1,594 te an ni a. High school zirtirtu post ruak 50 hnawh khah turin recommendation dawn tawh a ni a, post dang pawh hnawh khah phalna dil tuma inbuatsaih mek a ni tih a sawi bawk.