Aizawl February 9, 2024 : Mizo Zirlai Pawl (MZP) General Headquarters hruaitute chuan vawiin tlai khan School Education leh Higher & Technical Education Deptt changtu Minister Dr Vanlalthlana chu a pisa-ah an hmu a, MZP Executive meeting a a rel te an sawipui.

MZP hian an Executive Committee Meeting-in a rel Mizoram Eduction Service (MES) chungchang leh Rashtriya Uchchatar Shiksha Abhiyan (RUSA) hnuaia College building sak mek bakah District Institute of Education & Training (DIET) chungchang te an sawipui a ni.

MZP chuan Mizoram zirna in hma a sawn zel theih nan leh a enkawltu mumal tak an awm theih nan MES din turin Mizoram Sawrkar thuneitute a lo ngen tawh thin an ti a. Sawrkar tharin Policy-ah a lo neih ang ngeiin, Mizoram zirna enkawtu tur bik MES din ngei turin Minister hi ngen a ni. Heng bakah hian RUSA hnuaia college Building sak mek, a huna zawh loh tam lutuk chu enzui turin Minister hi a ngen a ni bawk.

Minister chuan, MZP thu thlen hi an lo enzui tur thuin a lo chhang a, hma an lak tan tawh thu leh Education reforms Committee-in a zirchian mek thu sawiin, RUSA hnuaia hnathawk mekte a hmunah a tlawh mek thu leh theih ang anga a enzui tur thu a lo sawi a. Sawrkar hmalaknaah tawiawm zel turin MZP hruaitute hi a lo a sawm bawk.

MZP chuan DIET Building hmun hrang hrang sak mek te pawh, a sak dan chungchang ah sawiselna tam tak an dawn avangin a tul anga enzui an tum thu Minister hi an hrilh nghal a, Minister tawiawmna an ngen nghal a ni.