June 20; 2022; Mizoram hmun hrang hranga kawngpui laih hna thawktu, National Highway Infrastructure Development Corporation Limited (NHIDCL) chuan, environmental clearance (EC) ngai lo tur nia ngaih theih turin, an hna te chu sector 28 ah an then a, hetiang a sector hrang hranga an then chhan sawifiah turin Mizoram sawrkar a Environment Forest & Climate Change (EF&CC) chuan NHIDCL an hriattir mek.

Mizoram Pollution Control Board (MPCB) a member secretary C. Lalduhawma'n ZALEN a hrilh danin, MPCB in 'show cause notice' an pek chu NHIDCL in an chhang tawh a, tunah hian EF&CC lamin hma an la chhunzawm mek a, EC ngai ngei ngei tura ngaih si, EC ngai lo tur anga sector 28 laia an thensawm te chu a chhan sawifiah turin NHIDCL hriattir an ni.

MPCB in NHIDCL hnen a'show cause notice' an pek ah leivung paih chungchang lam chu contractor lam mawhphurhna a nih thu in an insawifiah a, hetihlai hian MPCB lam chuan contractor te chu an thuhnuaia awm awm an nih avangin an (NHIDCL lam) mawhphurhna a nih thu an hrilh a, NHIDCL in contractor te instruction an pek dan te leh zawm tura an tih te chu hrilh turin MPCB in an hriattir a, chu chu MPCB lamin an nghak ve leh mek bawk.

MPCB member secretary sawi danin, km 100 aia thuiah EC a ngaih laiin, NHIDCL chuan km 100 tling lo zelin sector 28 ah an then a, hnathawh awlsamna zawk pawh a nih mai theih rualin, EC pumpelh tumna a nih theih avangin EF&CC chuan insawifiah turin a hriattir a ni.

Hetihlai hian inrinni June ni 18 khan ZPM Legislature Party (ZLP) chuan press statement siamin, NHIDCL in Mizoram hmun hrang hranga kawng an laihna leivungin mipui leh environment tan harsatna a thlen nasat viau tawh laia Mizoram sawrkar a ngawi tlat chu hriatthiam harsa an tih thu an tarlang.