ZALEN December 3, 2024: LESDE Minister Lalnghinglova Hmar chuan “Ei duh si, ei tur zawn peih si loh hi a zahthlak a ni,” tiin eng hna pawh, a thawhchhuah zat a tam emaw, a tlem emaw, thawhchhuah neih hrim hrim a hlut zia a sawi.

Vawiina khan Women Centre, Phunchawng atanga 2024 batch puanthui zirchhuakte thlahna hun khuallian nia a hmanpuinaah Tetea Hmar chuan eizawnna kawng tha tak tak a tam thu a sawi a, sawrkar pawhin skill training a pek thin a ti. Women Centre in hemi zawnga hma a lakna chu fakawm a tih thu sawiin, “Ei duh si, ei tur zawn peih si loh hi a zahthlak a ni,” tiin, Eng hna pawh, a thawhchhuah zat a tam emaw, a tlem emaw, thawhchhuah neih hrim hrim a hlu a ti.

Minister chuan Women Centre kaltlanga puanthui zirchhuak mi 300 chuang an awm tawh chu lawmawm tiin, 2024 batch atana zirchhuak mi 33 te chu a lawmpui thu sawiin, eizawnna tha taka an thil zirchhuah chu an chan ngei a beisei thu a sawi bawk.

Zirchhuakte hnenah certificate leh memento hlan an nih bakah tefung hrang hrang hmanga zirlai titha thlanchhuah te hnenah Khuallian hian puan thui khawl a hlan. Heng puanthui khawlte hi Usha Enterprise, Tuikual Pastor Bial Kohhran Hmeichhia leh Dawrpui Kohhran Hmeichhia ten an tumsak a ni. Amawii Hero chuan Women Centre hnenah hian Scooty pakhat vawiin programme ah hian an hlan bawk a ni.