ZALEN December 11, 2023 : BJP Mizoram chuan vawiin khan BJP State Office ah an MLA thar te lawmpuina inkhawm an buatsaih a, an MLA pahnih Dr. K. Beichhua leh K. Hramo ten thu sawina hun an hmang a, State Peresident Vanlalhmuaka'n lawmpuina thilpek a hlan.

Dr. K. Beichhua chuan, "Khawvela cheng minung nitina ei a, in a, e chhuak thin chuan a ei tûr petu a hlauh a, a do tlat chuan harsatna tam takin a tlâkbuak dawn a, do tur diklo, do tlat thinte chu an dam khawchhuak ngailo. Ei tur tha min petute kan do tlat chuan harsatna in min tlâkbuak ang a, he ram hi a dam tak tak thei dawnlo a ni," a ti.

Beichhua chuan sawi chhunzawmin, "Mizoram mipuite hian hlauh loh tur kan lo hlauh thin avang khan kan va mawl tak êm! kan tih hun hi a la thleng dawn a ni. Pathian leh mipui zara Mizoram MLA ka nih angin hlauh tur dik tak Pathian hi hlau zawk tur leh kan ram than lenna tur leh hmasâwnna min pe theitu tur party lam hi i hawi tawh ang u tiin Zoram mipuite ka sawm a ni," a ti bawk.

K. Hrahmo pawhin thu sawiin, "Central BJP tha chakna hmangin Mizoram hi hma kan sawn tir dawn a. Mizote hian BJP kan hlauhna hi paih thlak a hun tawh a, khua a tlai hma hian kan ram hian Central tha chakna a mamawh a ni. Congress pawh tun hma chuan Vai pawl, Vai Hindu pawl tia sawisel an ni thin, amaherawhchu term 5 lai sawrkarna an chelh zui thei tho a ni. Hetiang chiah hian mipuite hi kan thanharh hunah chuan kalphung dik tak leh system dik taka kalpui thin party hi Zoram mipuite'n kan thlan tur hmabâk a la ni dawn a ni," a ti.