December 7, 2022; Special Court (Prevention of Corruption Act) in eiruk thubuaiah PWD Engineer -in-Chief hlui Liansanga thiam loh a chantir a, vawiin khan Cenral Jail ah dahluh nghal niin, naktuk ah hrem a nih dan tur court in a puang nghal ang.

PWD Engineer-in-Chief hlui thiam loh chantir a nihna hi Kau - Tlabung Hydel Project leh Tuipanglui Mini Hydel Project siamna a sum tihchingpen thubuai a ni a, heng Hydel Project pahnih siamna ah hian sum indaihlo chhuanlam in tum engmemawza revised estimate siamin, sawrkarah sum an dil belh a, hei hi thil dik lo a nih piah lamah nasa takin hna a khaih lak a, heng Hydel Project pahnih ah hian kawlphetha siam chhuah hun tura ngaihah siam chhuah theih a nih loh avangin Mizoram sawrkar sum hloh chu Rs. Nuai 1839.10 tling a ngaih a ni.

Thubuai hi PRISM in FIR an thehluh atanga in tan niin, hunrei tak ngaihtuah a ni tawh a, court ah thu hretu thahnem tak thu zawhfiah tawh niin, sawrkar lam tang leh thubuai neitu ten mi 5 thuhretu an nei a, kum 2016 khan khatihlai a Special Judge chuan thubuai a puh te chu hrem turin finfiahna tha a awm lo ni a ngaiin, thubuai hi a lo titawp tawh a, thubuai thehluttu PRISM chu an lungawi loh avangin High Court a an zualko hnuah thubuai hi tihnun thar leh a ni.

A tirah chuan he thubuai ah hian mi 4 thubuai siam sak an ni a, EE pakhat leh Supplier te thiam loh chantir an lo ni tawh a ni. Vawiin a he thubuai ngaihtuahtu Special Court (Prevention of Corruption Act), Dr. HTC Lalrinchhana chuan PWD Engineer - in- Chief hlui chu puh a nihna ah thiam loh chantirin, vawiin khan Central Jail ah dahluh nghal a ni a, court in naktukah hrem a nih dan tur a puang nghal ang.