June 2, 2023; MAMCO sum cheng nuai 268 tihchingpen a puh vanga ACB in thubuai an siamsak Musta Gur Rahman s/o Adbur Rahman, Gauhati chu Dr. HTC. Lalrinchhana, , Special Judge (PC Act) Court in thiamloh a chantir. June 5, 2023 ah hremna a puang ang.

MAMCO sum cheng nuai 268 tichingpena puh vanga Anti Corruption Bureau (ACB)-in thubuai an siamsak Musta Gur Rahman, Guwahati chu February 24, 2023 khan New Delhi-ah man a lo ni tawh.

MAMCO sum cheng nuai 268 eiruknaah ACB chuan December 3, 2015 khan thubuai an ziak lut a, an chhuinaah khatih laia MAMCO deputy manager Lalremthanga leh a consultant Musta Gur Rahman chu inhnamhnawihah puh an ni.

ACB chuan Lalremthanga leh Musta Gur Rahman te chu an man a, interim bail hmangin Court-in a chhuah a ni. A hnuah Guwahati High Court, Aizawl Bench chuan Musta Gur Rahman bail dilna a hnawl a, court hniam zawka kal turin order a siam a. mahse, Gur Rahman chu court hniam zawkah inlan loin a tlanbo zui a ni.

Lalremthanga chu Special Judge (Prevention of Corruption Act) chuan November 22, 2022 khan thiam loh a chantir a, kum 5 chhung tang tur leh Rs 5,00,000 chawi turin a hrem. Gur Rahman man phalna (warrant of arrest) pawh court chuan a tichhuak nghal bawk. 

ACB chuan warrant of arrest bawhzuiin Musta Gur Rahman chu an zawng reng a, Mizorama IPS officer lo thawkte puihnain February 24, 2023 khan man a ni.