Eiru tihte, eirukna tihte hi Mizo zinga thumal langsar tak an ni tawh a, kan ram tithuanawptu titein sawi a ni thin a, a do pawl thlengin an piang hial tawh a nih kha. Mi chanai chhuh hi hnam angin kan duh loa, khawtlang angin kan do a, kohhran ang te pawhin ti lo turin inzirtir na pek thin a ni bawk a ni.

Thuneihna sang tak nei Special Court chuan tunhnai khan Mizoram hna sang tak chelhtu IAS officer chu eirukna thubuaiah thiam loh a chantira, pawisa chawi tur leh hrehawm taka kum thum chhung lung in tang turin a chungthu a relsak bawk a ni. A hma deuh khan hemi court vek hian MCS senior pakhat chu eirukna thubuai vang thoin thiam loh a chantir tawh bawk a, ani pawh hrehawm taka tang tura a chungthu rel a ni bawk a ni.

Mi nawlpui ngaihdanah chuan kan ramah hian eirukna a hluar tawh hle a, eiru thin nia ngaihte chu officer lian leh politician te an ni ber a ni. Mahni hlawh emaw lakluh emaw phu loa in leh lo nei thate leh khawsak sang te chu eirukna a inhnamhnawih nia kan ngai tlangpui a ni. Eirua kan ngaihte hi dan chungah an leng emaw tih mai turin an chungah eng teh chiam a thleng ngai lem loa. Kohhran thlenga ngampa an nih thin avangin mi tam takah beidawnna a thlen mek a ni a. Hrem an tawh ngai lem loh avang hian eiru nia kan ngaih mi hausate chu ‘intlawn siak pawh pawi kan ti lo’ ti tein kan sawi phah fo thin a ni.

Eiru hrem an nih ngai loh vanga mipui moral thuk taka a chhiat thinna hi a tehfung a awm thei pawhin a rinawm loh a, sumah chantir dawn ila a hlut zawng pawh teh phak a ni lo hial mai thei.

Eirute hi mi chanai chhuhtute an nih avangin ramin a chhiat phah a, mipuia hnenah dik takin sum a thleng lo a, ram ruhrel hmasawnnate pawh a thuanawp thin a, ram tana huatthlala awm takzet a, kan do a tul, tha thlah loin hremna an hmuh theihna turin beih a ngai reng a ni. Eirukna laka ram tifihlim duhte tan chuan tuna court-in ro a rel dan hi pawm mai tur niin a lang bawk a ni.

Ti dik lotute chu tupawh nise danin a zuah dawn lo tih thuchah anga ngaih theih tura tuna court-in a siam hi chungnung zel sela, hei bakah hian politician eiru thubuai neite pawh zuah loh ni zel se tih hi mipui duhthusam a ni ngei ang.