An inlei fel vek tawh emaw tih hnuah buaina an nei zui a, tunah chuan court hial an thlen a ngai ta. Twitter chuan an company lei tumtu Elon Musk hi an khing a, hemi chungchangah hian Elon Musk pawhin Twitter hi a khinglet ve ta. 

Delaware Court of Chancery, chancellor Kathaleen McCormick chuan Elon Musk hi October 17 atanga trail nei turin a ti a, hei hian ni nga chhung a awh dawn. Court chuan Musk hi he deal atang hian inhnukdawk thei a ni em tih sawifiah turin a ti a ni. Court order a chhuah hnu lawk Zirtawpni khan Elon Musk hian Twitter khinletna hi a thehlut ve leh a, a document thehluh hi phek 164 zet a ni. Khinlet an nih chungchangah hian Twitter hian thuchhuah an la siam lo thung. 

Elon Musk hian Twitter hi $tld 44 zetin a lei niin thu a thang hman a, hei hi India pawisa phei chuan cheng vaiblechhe nuai 3.5 vel zet a ni. Mahse Musk hian a rilru thlakin a inhnukdawk leh a, Twitter pawh an lawm lo hle. Hei vang hianCourt-ah an inkhing zui a, October-ah an chungchang hi ngaihtuah a ni ang. Musk hian Wilmington, Delaware-ah kar khat chhung trial a hmachhawn dawn bawk a, October 24 atanga tan tur a ni ang. 

Twitter chuan Musk nena indawrna an kalpui thla thum chhung khan US Dollar maktaduai 33 zet an hloh thu an lo tarlang tawh a ni. Kumin April atang khan indawrna hi an kalpui tan a, media lamah phei chuan an inlei fel tawh niin an tarlang hman hial a nih kha. Twitter hian indawrna hi kaltlangpui an duh a, court-ah an zualko a ni.