SpaceX hotupa Elon Musk chuan US Dollar tluklehdingawn 44 ($tld 44) zetin Twitter a lei ta riap mai le. Kum 50 mi Elon Musk chuan censorship a tih tlem tur thu a sawi nghal a, hei hian human rights group te beng a verh nghal zar mai. 

Twitter hmangtute chuan account suspend mekte company lamin an hlihsak dawn em tih chu an zawhna lian ber pakhat a ni bawk a, suspend mek zingah pawh hian Donald Trump pawh a tel a ni. US president hlui Donald Trump hi Twitter-a a thu post avangin hun eng emaw chen a account khawih chet theih loha hren sak a ni tawh.   

Khawvela hausa ber nihna dinhmun luah mektu Elon Musk hian Twitter CEO a thlak nghal ang em tih chu zawhna awm nghal a ni bawk. Twitter CEO ni lai Indian-American software engineer Parag Agrawal hi thla 12 ral hmaa a ban a nih chuan $mtd 42 a pek a ngai dawn nia tarlan a ni.