English professional footballer, Arsenal tana tun laia che tha leh an rinrawl ber zinga mi, Emile Smith Rowe hi July 28, 2000-a Thornton Heath, London chhim lama Croydon-a piang a ni a. A hnuah London hmar veng, Arsenal thuthmunah hian kum 2010-a a unaupa nena an lak luh khan an chhungkua hian an pem a ni.

A unaupa (cousin), Dean Smith Rowe pawh semi-professional footballer a ni a, Belgian club Genk-ah a khel ve a. Attacking midfielder leh winger anga khel thei niin club lamah Arsenal tan leh England tan under-21 football team tan a khel.

Smith Rowe-a hian senior team-ah Arsenal tan kum 2018 khan a inlan tan a, a hmain intuaihriam nan RB Leipzig leh Huddersfield Town-ah loan-in a chhuak a. Tunah erawh Arsenal tana player pawimawh ber pakhat a ni tawh.

Ram tan youth team hrang hrangah a lo inlan tawh a, FIFA U-17 World Cup-a an champion tum pawhin team khaidingtu zinga mi a ni.

An veng club ni ta, Arsenal hian kum 10 mi lek a nih lai, kum 2010 khan Hale End Academy-a inzir turin an la a. Under-23s team tan 2016–17 khan kum 16 mi lek ni chungin a inlan phak tawh a, a theihna a sang hle.

Under-23s team-ah hian 2017–18 season khan khel zuiin vawi 10 a inlanah a thiante goal thun tur vawi hnih siamsakin goal khat a thun bawk. July 31, 2017 khan kum 18 a tlin rualin professional contract a ziak zui ta a ni.

Contract puitling a neih hma, kum 17 chauh a la nih laiin senior team tan a inlan tawh thung a, July, 2018 khan Singapore-ah pre-season tour-ah an hruai tawh a. International Champions Cup-ah Atlético Madrid nena 1-1 a an inhnehtawk tumin goal a thun nghe nghe.

He an zinnaah hian a che chhe lo viau va, 5–1 a PSG an hneh tumin a thiante goal thun tur tum khat a siamsak a, hei hi a piancham chiah, July 28 a ni a, kum 18 lawmna a ni.

July 31, 2018-a contract an ziah tumin hetih laia an head coach Unai Emery chuan theihna tam tak nei niin a sawi a. Arsenal chuan ‘hun rei tak’ cham tura an inrem thu an sawi a; mahse, kum nga phawt nia sawi a awm thung.

Smith Rowe-a hian Arsenal first-team tan inelnaa a inlan hmasak ber chu September 20, 2018 khan niin UEFA Europa League-a Vorskla Poltava an hmachhawn tumin a ni a. Alex Iwobi thlakin a lut a, a hnu zelah chuan team tana tangkai tak a ni ta.