Tennis inelna khawvela inelna lian bik, Grand Slam an tih zinga kumina khelh hnuhnung ber, US Open khelh zawh taka hmeichhe lama rin loh taka champion, Emma Raducanu hi November 13, 2002-a piang a ni a. British professional tennis player niin US Open Champion a ni mek a. British No. 1 a ni mek a, September 13, 2021 khan a tawnsan ber lai tawngin hmeichhe maltanah World No. 23 a ni phak.

Raducanu hi Toronto, Canada-a Chinese nu leh Romanian pa laka piang niin London khawpuia sei lian a ni thung a. Ranking-ah No. 338 ni chungin Raducanu-i hian wildcard hmuin 2021 Wimbledon Championships-ah a vawi khat nan a inlan phak a, 4th round thlengin beisei phak bak a ni a, hriat a hlawh tan nghal.

Thla hnih chauh a liam leh tihin 2021 US Open qualifying khelin main draw-ah a tel phak leh ta a, Open Era-ah qualifier ni chunga Grand Slam singles final thleng thei hmasa ber leh champion ni thei hmasa ber a ni kawp ta hial a ni.

Final-ah hian Raducanu-i hian Leylah Fernandez a hneh a, tournament chhung zawngin set a hloh miah lo nghe nghe a. British hmeichhe zingah Virginia Wade-i kum 1977 Wimbledon Championships-a a champion hnua Grand Slam-a champion leh hmasa ber a ni a, US Open bikah phei chuan kum 1968-a Wade-i hnua British hmeichhe champion leh hmasa ber a ni.

Raducanu-i pa hiuu Ioan Răducanu niin Bucharest, Romania atanga Canada-a pem niin a nu hi Shenyang, China lam mi a ni thung a. A puitlin hnuah hian a nu leh pa hi ‘lehkha zir mi chhungkua an nih thu leh communist ram mi ve ve an ni a, zirna bak chu kawng a awm lo’ tih chu an ngaihdan a nih thu a sawi.

An chhungkua hian kum hnih a nih laiin England-ah an pem a. Raducanu-i hian kum nga a nih laiin tennis a khel tan a. Bickley Primary School-ah kai hmasa berin Newstead Wood School-ah a kal a, hei hi Orpington-a grammar school thlan chhuah niin lehkha pawh a thiam thei fu a, mathematics-ah A* leh economics-ah A a hmu bawk a, A-Level niin a zir chhuak.

A naupan lai hian infiamna dang - basketball, golf, karting, motocross, skiing, horse riding leh ballet thlengin a ti kual ve a. Tun thlengin Formula One fan ruhkawl a la ni bawk.

British leh Canadian khua leh tui ni kawpin Mandarin tawng a thiam tel bawk a, Taiwanese television show a en nasa hle.