ZALEN September 27, 2026: Excise & Narcotics Department (END)-in kum 2024 atanga tun thlenga ruihhlo chi hrang hrang an mante chu Rs. 2,03,65,84,400 man hu a tling.

END tar lan danin hemi hun chhunga ruihhlo mante hi heroin, opium, ganja, methamphetamine, Pseudoephedrine, nitrazepam, Diazepam, Alprozolam, Tramadol, Codeine based cough syrup, Dextropropoxyphene te an ni.

Ruihhlo luhnate hi Indo-Myanmar border atang te, Inter State border – Assam, Tripura leh Manipur border atangte-in a ni.

Home Minister K Sapdanga leh Excise & Narcotics Minister Lalnghinglova Hmar te kaihhruai tun hnaia ruihhlo do beihpui thlak dan review meeting-ah tun dinhmunah Mizoramah ruihhlo chi hrang hrang - heroin, khuh damdawi chi hrang hrang, ganja leh ruihhlo dangte a hluar hle tih tar lan a ni.

Mizoram pumah September, 2025 atang khan ruihhlo do beihpui hi thlak tan a ni a, Operation Jericho tia hming vuah a ni a. Ruihhlo do kawngah hian Mizoram police leh excise department a thawktute chu Central YMA hnuaia Central Anti-Drug Squad (CADS)-in an thawhpui zel a. Sawrkar atang pawhin sawrkar hnathawkte tha tihchak mai bakah tlawmngai pawlte tha tichak zel tura hma lakchhunzawm zel chu sawrkar hmalakna kal lai mek a ni bawk.