Aizawl: Excise & Narcotics Department chuan lirthei veivak ah te ruihhlo dap turin an inbuatsaih mek a, hemi atan hian hma an la chho mek.

ZALEN-in Excise & Narcotics Department hotute hnen atanga thu a dawn danin Mizorama ruihhlo lo kal tamna ber Myanmar ah tualchhung buaina a awm avangin ruihhlo lo lut a tlem niin an sawi a, "Mizorama ruihhlo 80% vel hi Zokhawthar kaltlanga lo lut a ni a, mahse Covid-19 avangin mipui te an fimkhur a, Myanmar atanga lo lut hi a tlem hle niin kan hria," an ti.

Mizorama ruihhlo ti thin mi thenkhat te Bagha velah ruihhlo ti turin an kal nasa nia sawi awm chungchangah, "Assam lamah hian ruihhlo ti tura chhuk chu an awm zeuh zeuh a. Addict kan man te hi test loh chuan kan kawl mai ngam lova, RAgT test an nih hnuah Golgotha Camping Centre, Vairengte emaw Sethawn a ruihhlo ngai enkawlna hmunah te kan dah thin a ni," tiin Vairengte-a Excise checkgate chu hripui leng vanga an khar hrih thu leh duty te pawh Covid-19 duty lamah an in dah tih an sawi bawk.

Excise & Narcotics Department hotute sawi danin tunlai hian heroin chu a man a danglam lutuk lova, hawng khat Rs. 40,000 atanga 50,000 inkar a ni tih ZALEN an hrilh bawk a ni.