Aizawl January 19, 2023: Excise & Narcotics Department chuan vawiin January 19, 2023 khan Phunchawng leh a chhehvel ramah dan lo anga zu siam dap runpui an nei a. Heng lai hmuna zu siam te in lo turin mipui te an chah. 

END te hian Zu siamna hmun 30 chuang an tichhia a, zu siamsa leh bungbel engemaw zat a hmunah tichhiain an man. Excise hotute lam atanga thudawn danin Heng laihmuna zu siamte hi zu siam dan pangngai lova siam a nih avangin mihring in atan a hlauhawm hle niin an sawi a, in lo turin mipuite ngen nghal bawk a ni.

Excise & Narcotics Department leh 42nd Assam Rifles te thawk dun chuan January 18, 2023 (Nilaini) khan Ruantlang khaw bul, Farlui Road, Champhai District-ah Heroin gram 580 & mg 400 (Hawng 50) leh a neitu nia puh mi pahnih –Vanlalrina (32) s/o Ralluaia (L), Khawmawi, Myanmar leh Vanlalsangliana (34) s/oJ.H. Lalhreliana, Venglai, Champhai-a khawsa nia inchhalte chu an man bawk.

Heroin vanga mante hi The Narcotics Drugs & Psychotropic Substances Act, 1985(NDPS Act) tlawhchhanin thubuai siamsak an ni a, vawiin January 19, 2023 khan Court-ah hruai nghal an ni.