-Dikteii Hnamte

Tukin ka inbual zo, darthlalanga ka inen chu ka thi awrh, silvera siam, Jaipura kum 6 vel kaltaa ka lei (to lem lo tak) ka’n hmu kha ka rilruah thil  tamtak a lo lut zut zut a.

Kar kalta lawk khan kan nau pakhatin, “I thi kha a van nalh em em, platinum em ni? I duh loh hunah ka lo lei chhawng ang aw…” a ti a. Platinum anih loh thu ka hrilh a, platinum awrh phak hmel hmuha min hmu kha a lawmawm hranpa ve phian lawi a. Chu kan nau min ‘brand’ dan kha ka tan chuan a hlu ve tlat zu nia!
    
Sumdawnna lamah hian ‘branding’ hi ngaihpawimawh a niin hei hian hlawhtlinna leh hlawh-chhamna a keng tel nasa hle tih chu mi vengva chin chuan an hre vek awm e. Keini India hmarchhak kila khawsa te pawh hian kan thawmhnaw inbel te, kan ei leh in te pawh hi a siamtu hming atangin kan tehin duh tur leh duh loh tur kan thlang tlangpui kan tithei awm asin. Sumdawng/thilsiam lian hming pu ve tho eng engemaw chu ‘a dap’ (duplicate) nia kan hriat chu kan iai nghal ngawt a (a thatna lam chhût hma hauh pawhin)! Rintlak taka hun rei tak lo sumdawng tawh hming hawha rintlak lutuk lova lo sumdawng ve lah an kat nuk bawk a. Hetiang anih avang hian ‘a dap’ leh ‘dap lo’ hriat dan chi hrang hrangte pawh a lo chhuak chho ve ta zel bawk a.

Siamchawp, chhe thei leh ral theiah mah rintlak leh rintlak lo te, tui leh tui lo te leh tehna dang dang kan neih lai hian keini mimal tinte hi eng nge kan ‘brand’ ni ve ta ang le?

Mitthi kan awma an chanchin kan sawi thin hi an ‘brand’ chu a ni mai ang em? Nge mitthi tawh na na na a tha lo lam sawi a mawi loh avangin a tha lam chauh kan sawi lang tawh zawk? 

Kei hi, hun engemaw kalta atang khan mitthi an awm ka hriat apianga “ka thih ve hunah ka chanchin hi miin engtin nge an sawi ang le? Ka ‘brand’ hi eng nge ni ang aw….?” tia ngaihtuahna sen ching riau ka ni a. Mi min sawidan turte hi thlarauvin zuk thlirin zuk hmu thei ila aw…. ti mai maia inngaihtuah fo ka ni pek a!

Ka ‘brand’ duhawm vak lo ka hriat chian em em chu ‘tlai’ hi a ni! Mahni hun neih leh tihtur hisap thiam mang lova hun tiama thleng hman lo ka ni fova, kan Biakin, kan in atanga hnaite pawh dar nawn hnua pan vawn vawn thin ka ni hi ka zep avanga mi hriat loh theih a ni lova, usher hovin min brand dan tur chu ‘tlai deuh ziah’ tih kha a ni tlat. A va tha lo tak!

Nihna (brand) hi thawk leh khata neih thut a ni lova, hun engemaw chen ‘rintlak’ taka a thlen huna neih theih chauh a ni. 

Kan tihthan hi kan nihna, miin min hriatna a nih mai si avang hian kan damlai ngei a ‘brand’ tha, mawi leh tui ni tura insiamrem a va pawimawh tehlul em!

Kan brand hi ‘thinchhia’ nge ‘zaidam’? ‘Dawhthei’ nge ‘kut rang’? ‘Rintlak’ nge ‘rinduap’? ‘Dikna ngaipawimawh’ nge ‘dikna palzam?’ ‘Nelawm’ nge ‘hlauhawm’? Sawi tur a tam awm e.

Sumdawngte’n an brand tihlar nan chi hrang hrangin an inzuar a, a taka kan tem hunah a dik leh dik lo kan teh thei thin. Keini erawh chu inzuar lovin kan chetzia miin an hmuh atangin kan brand hi min pe thung a. Keimahnia that(loh)na emaw an hmuh atanga kan hlawh chhuah a nih miau avangin midangte tana ngainatawm leh rintlak brand ni turin insangmar sauh sauh ang u.