- Lalzidinga Sailo, Khatla Kum 1894-a Arthington Mission-in missionary pahnih J.H.Lorrain leh F.W.Savidge an rawn tirh atangin Kristiana inlet kan awm tan niin kan history chuan a sawi a. Tin, Pastor Liangkhaia’n kum 1947-a a ziah “A History of Lushai Hills Part II”-ah chuan, “Mizo leh Vai inkah lai khan Khasi rama Welsh Mission mi, Rev. William Williams an tih chuan Zoram tlawh a tum a, Tlawng dungah Changsil thlengin emaw ni a lo zin a; mahse, ram hel a la nih vangin sawrkarin kal zel an phal ta lo va, a haw leh a, Welsh rama Mission hotute hnenah Mizorama Missionary tirh a tulzia a sawi a. Tichuan, Rev. D.E.Jones chu an rawn tir a, kum 1897 August thla hian a thleng a, Pu Buanga (J.H.Lorrain) thian dun kha Aizawl thingpui huan tlangah khan a rawn hrawn,” tiin. Pu D.E.Jones chuan hna thawk chhoin Kristian kan pung chho ta a ni. Kum a lo vei chho a, Mizote chu Kristianah an lo inlet zo ta a. Tichuan, kum 1994-ah khan Centenary chu ropui takin Mizo Kristiante chuan A.R.Lammual-ah kan lawm ta mup mup mai a nih kha. Chutia kum za meuh mai Kristian ram kan nihna kan han lawm ta mup mup mai chu ropui tak a ni. Amaherawhchu, kha kan Centenary lawm tum khan sap (Mi ngo) Pastor pakhat lo tel ve sawi, lehkhabu pakhata ka chhiar chuan rilru a khawih hle mai. Chu chu hei hi a ni, “Ti hian Mizo chu in zavaiin kum 100 chhung lekin Kristianah in inlet vek thei a, kum 100 dang lo awm leh turah hian eng sakhua nge inzawm leh ang le?” tia a sawi kha a ni. Tin, Mizo Lalho an bân dawn khan khatih laia Superintendent McDonald-a khan Lalho a koh khawma a thu sawi, “Ti hian Lalho chu in bâng ang a, Mizo chu lawm takin inral ang,” a tihte khan ngaihtuahna a tithui khawp mai bawk a. Tin, kum 1980-81 khan ka hnathawhna lam thilah ISEC (International Statistical Education Centre), Calcutta (Kolkata)-a ka training-pui pakhat Dhaka (Bangladesh) atanga lo kal chuan ti hian a sawi, “Islam (Mosolman) hian India hmarchhak hi chu kan la luahkhat vek dawn, kum tam a ngai lo vang,” tiin. Kan Chief Minister hlui Brig. T.Sailo (RIP) khan kan ram mamawh hmasa ti-a Bairabi Hydel project a buaipui khan bungrua motor-a phurh theih loh tur kha tam tak a awm dawn avang leh buhfai leh kan state mamawh tlawm zawka tam tak a lo thlen theih dawn avangin Rail Head a awm a ngai tiin Foundation stone kha Central Minister a phumtir a nih kha. Ram buai chhah em em lai kha a ni a; amaherawhchu, Mizo mipuite hmakhua ngaiin chimral awlna kalkawng tha tak a nih theih dawn avangin Bairabi thleng chauh tur-in an ti nghe nghe a nih kha. Khatiang rilru nei loin tunah hian Sairang thleng turin hma lak mek niin an bung tlut tlut mai a nih hi. Mahni ram leh hnam hi kan hmangaih tawk lo em ni ang? tih mai a awl a ni. Hmani, 27th May, 2016 (Zirtawpni) khan India Prime Minister chuan Bairabi-Silchar ni tin khualzin tam zawk kal theihna turin Train Service Broad Gauge a hawng a nih kha. Bairabi leh Silchar inkarah station 14 awmin darkar 4 chauh a tlan dawn bawk a ni. Kan sawrkar hian check gate tha siam tak ang mawle? Ram hmangaihtu tan chuan ngaihtuahna hman a va han ngai em! Kum khat chhungin vai/hnam dang, mi tha ni lo, anmahniho pawhin low class/labour class an tihho eng ang tak lo luh belh ang maw? Kum 1986 hnu lam atang khan Bengali Muslim an pung chak em em a. Zing dar 4-5 inkar velah hian an lo thleng nasa a ni. Tam tak hi chu chhim lama tlangte an ni. Kan check gate-a duty-te hian hnam angin thahnem an ngai lo deuhte pawh a ni thei bawk. Heng hian ngaihtuahna hmangte tan chuan mutmawh hnarmawha neih chi a ni. Sawrkar hi khauh deuh teh se. Engpawh nise, mi rama Muslim an pun nasatzia han sawi ta ila. Kum 2012 Presbyterian Kohhran Nilai leh Beihrual thupui an zirah khan hnamtin dinchhuahna atan chhungkaw tinin a tlem berah fa pahnih tal an neih loh chuan kum 25 chhung hnam a dingchhuak zo lo tura ngaih a ni a ti a. Heng ram France, England, Greece, Germany, Italy leh Spain ramhoah hian kum 1990 atang kha chuan mihring punna 90% chu Muslim pem lutte an ni. Kan state-ah pawh hian an lo lut nasa em em a, engzat chiah nge lo lut kan hotute hian an ngaihven ve em? France ramah khuan chhungkaw tinah Muslim 1.8% awm zel ang an ni. Kristian biak in aiin Mosque a tam tawh zawk. England-ah pawh Kristian Biak in aiin Mosque a tam tawh zawk a, tam tak khu Kristian Biak in hlui a ni. Russia ramah chuan an sipai 40% khu Muslim an ni tawh, Belgium-ah chuan nau piang 50% khu Muslim an ni. Germany Federal Statistics report-ah chuan kum 2050-ah chuan Germany khu Muslim ram a ni dawn tih a ni. Tin, Islamic Strategy Conference, Chicago khawpuia neihah chuan kum 30 chhungin America ramah Muslim vaibelchhe nga kan awm tur a ni an ti rup mai. India ram chu Hindu ram a ni a, Muslim leh sakhua dang bia pawh kan inpawlh. Amaherawchu, North east state hi kan thlir chuan Bangladesh atanga India an rawn luhna kawngpui ber a ni tlatin a lang. Cachar-ah pawh an tam tawh. Tripura-ah te, keini state-ah te kan la mawl bik avangin (Mizo mipui nawlpui hian vai hnam zia hre pha lo kan ni a) an rawn lut nasa sawt hle. An nupui fanau chenin an lo lut ta. Mizoramah an fate an pian chuan Mizoramah Birth Certificate pek a nih dawn avangin ngaihtuah chian a ngai ani. Keini ramah hian eng ang takin nge sakhaw dang an lo pun tak dan atangte hian kan ram hruaitute hian lo hmu ve se a va duhawm em! Kum 1951, 1961, 1991, 2001 leh 2011 chhiarpui record-te hi i han bih chiang teh ang. Kum khat chhunga an pun dan sanzia te leh Kristian pun chak loh sizia te hi ngaihtuah a va han ngai dawn em! Demography zirna atanga chhut phei chuan Mizo mipate hi kan hmeichhiate hian an in daih tawh lo a, heng Muslim-ho fate hi kan hrinsak zawih zawih mai ang tih a va hlauhawm em! Hindu sakhua bia hi pun aiin an tlahniam zel a, hei hi a chhan nia lang chu Muslim leh Hindu hi an inmil loh vang a ni thei ang em? Kristian aiin Buddhist leh Muslim an pung chak zawk tih kan hmu thei awm e. Hetiang aia nasa hian an pung chak dawn tih hi mi thil chik mi chuan an hria ang. Eng chen chiah nge Kristian ram kan intih ngam ang le? Kum 2021-ah kan la dam chuan tun ai hian Muslim te hi an pung chak lehzual thei a ni. Chuvangin, ram leh hnam hmangaihtu tak tak sawrkar hotu Mizo mipuite hian kan thlan a ngai tak tak ta. A tlai tawh viau nain chhan theih kan la nih takin!