Aizawl April 7, 2024 : Kum thar, 2024-2025 chhunga Mizoram êng chhit man tur chu Joint Electricity Commission for Manipur & Mizoram chuan a bithliah fel a. Chawhrualin mipuiten kawlphetha hman man hi unit khat Rs. 8 zel an chawi dawn a, êng chhit man tihsan a nih loh avangin sawrkar chuan thla tin subsidy Rs. vaibelchhe 16.43 a tum a ngai dawn a ni.

P&E Dept. chuan kumthar (FY 2024-25) chhunga consumer-te êng pek nan unit khat zelah Rs. 11.83 mamawh tura an insawi laiin commission chuan Aggregate Revenue Requirement (ARR) a bituksak atanga chhutin an mamawh hi unit khat zelah Rs. 11.61 ni turin a ti a. Rs. 11.61 hi subsidy tel lova chawhruala unit khat zel man tur, Full Cost Tariff (FCT) a ni a, sawrkarin subsidy a pek loh chuan FCT hman tur a ni.

Subsidy Rs. vaibelchhe 197.23 hi sawrkarin advance-in thla tin Rs. vaibelchhe 16.43 a pe tur a ni, a pek loh chuan FCT hmangin bill siam tur a ni a, sawrkarin subsidy a pek hunah bill-ah siam rem (adjustment) leh tur a ni.

Sawrkarin subsidy a peksak chuan tlawm zawkin mipui hnenah chawhrualin unit khat man Rs. 8.00 vel zelin an pe thei dawn ta a. consumer-te subsidy a peksak tur hi a pum puia chawhrualin unit khatah Rs. 3.61 vel zel ang a ni.

P&E Deptt.-in FY 2024-25 chhung atan ARR leh tariff bithliahsak tura an dilna chungchang hi March 13, 2024 khan Mizoram State Advisory Committee meeting-ah sawiho a ni a. Hei bakah Tariff Petition chhungchangah hian March 14, 2024 khan Aijal Club-ah public hearing neih a ni a. Public hearing-ah hian hun bituk chhunga rawtna leh sawiselna siam awm chhun thu thlen leh P&E department-in an chhanna ngaihthlak a ni.