Aizawl; Mizoram sawrkar hnuaia department leh office te chu sawrkar hnathawk leh mipui nawlpuite awlsam zawkna turin English leh Mizo version a thuchhuah siam thin tur a hriattir an ni.

Hemi chungchang June 22, 2021 a Addl. Chief Secretary, JC. Ramthangan hriattirna a tihchhuah ah, sawrkar office hrang hrang a thuchhuah awm te mipui tam zawkin an hriatthiam theih nan sawrkarin harsatna sutkian dan a ngaihtuah tih tarlan a ni a, kum 1987 a Mizoram Governor in a lo pawm tawh, Section 3 of the Mizoram Official Language Act 1974 angin, Mizo tawng chu sawrkar hnuai a thil pawimawh reng reng ah hman tur a ni tih tarlan a ni.

Sawrkar thu puanzar leh office thuchhuah te chu English leh Mizo version a siam zel a nih theihna turin sawrkar department hrang hrangte chu thil tul te lo bawhzui a hmala turin Add. Chief Secretary chuan a hriattir nghal bawk.

ZALEN zawhna chhangin sawrkar hnathawk inzawm-khawm pawl FMGE&W a Secretary general J. Ramdinmawia chuan kumin March 19 a conference an neih ah hemi chungchang hi agenda lut angin an ngaihtuah tih sawiin, sawrkar ah pawh ngenna an thlen tih a sawi. 

"Sawrkar thuchhuahte a hre tur tam takin an hrefiah lo thin a, Mizo tawng chu official language a nih tho avangin, mipui leh sorkar hnathawk huap turte English chauh a ti lo in, dual language awm turin kan rel a, chu chu sorkarah kan thlen," J. Ramdinmawia chuan tiin, sawrkar hnathawk zawng zawngte emaw mipui nawlpui huap tur sawrkar thuchhuah awm reng reng chu English leh Mizo version awm zel tha an tih thu a sawi.