Engmah anni chuang lovang ti fotu te hi mi beidawng an ni - Tetea Hmar
![](/storage/news/post/ydVuLgXi6eozSNQQ3OcQyVaXuq6aRdbTuckZ9hBr.jpg)
Aizawl May 1, 2023 : ZPM chuan 2023 Inthlan atana Aizawl West II vil tura an lo ruat tawh Lalnghinglova Hmar chu vawiin khan an Leader Lalduhoma chuan a lawmlut a. Lalnghinglova Hmar chuan, "Anni pawh sawrkar se engmah an ni chuang lovang ti fotu te hi mi beidawng an ni. Keini chuan beiseina kan nei," a ti.
ZPM zawm thar Lalnghinglova Hmar chuan thu sawiin, “Keimah ang bawka ram siamthat tak tak duh, beiseina nei tlat mipui, thalai leh kohhran rawngbawltu an tam em em a ni. Kan danglam dawn ti ngam leader Pu Lalduhoma kaihhruaina hnuaia kum 2023 kum tawpah sawrkar thar siam a, chuta tel ve thei tur leh ram tana ke ka pen ve tur hi ka lawm takzet a ni,” tiin, “Beidawng te karah beiseina nei tlat mihring tam tak kan la awm a, anni pawh sawrkar se engmah tak tak an ni chuang lovang ti fotute hi mi beidawng an ni. Keini chuan beiseina kan nei a, ram hi siamthat theih a la ni; beiseina mei kan chhi alh zel dawn a ni,”a ti.
Tetea Hmar chuan, “Tam takin tih tur an sawi thin a, ZPM pawhin tih tur tam tak a ruahman; chutihlaiin a tih ve loh tur a sawi bawk a, he a tih ve loh tur a tih hi a ropui ka tih lai chu a ni. Rualawhna tawp thei lo ka nei a. Eng vangin nge Mizote hi mite thil dil a, an kohsak leh tihsak ngaia kan la awm reng bik? Ngaihtuahsaktu leh kohsak theitu engtikah nge kan nih ve theih ang tih hi ka rilru luahtu a ni. Mizoram-ah ZPM lian takin kan ding ang a, India ram alhchhuak thei khawpin lian zawkin kan insiam tur a ni," a ti.
Sawrkar tha in thil danglam a thlen thin thu sawiin, "Thenawm Myanmar-ah hun rei lote chhung mipui sawrkar a ding a, kan rama hnathawka lo kalte an haw fai vek mai. A nih dan tur leh awm dan tura ram a kal chuan hmasawnna a lo thleng mai thin a ni. Politics-ah nuho, hmeichhia an tel tam a ngaiin ka hria. Hmeichhia ten role pawimawh tak an nei a, he Zoram siamthatna turah hian hmeichhiate lo tel ve a, a tangkai ber ber ni turin ka duh a ni. Kalphung thar nei a, hmasawn kan duh a, kalphung thar hnuaia Zoram hmasawnna tak tak kan duh a nih ngai chuan kumin kum tawpah inthlanpui kan neih hunah ZPM lo vote turin Mizoram mipuite kan sawm a che u,” a ti bawk.
Latest News & Chhiar Hlawh
-
1m | Sep 07, 2024
-
2m | Sep 07, 2024
-
1m | Sep 07, 2024
-
1m | Sep 07, 2024
-
1m | Sep 06, 2024
-
1m | Sep 06, 2024
-
2m | Sep 06, 2024
-
3m | Sep 06, 2024
-
1m | Sep 06, 2024
-
1m | Sep 06, 2024
-
2m | Sep 06, 2024
-
1m | Sep 06, 2024
-
2m | Sep 05, 2024
-
1m | Sep 05, 2024
-
1m | Sep 05, 2024
-
1m | Sep 05, 2024
-
2m | Sep 05, 2024
-
1m | Sep 05, 2024
-
1m | Sep 05, 2024
-
1m | Sep 04, 2024