Reuben Lalnunthara Hnamte-

Tuk khat chu zing kan tho va, favang ni thiang duhawm tak, boruak thianghlim leh engmawi tak chuan Pathian ropuizia  min hriat thar tir hle mai. Favang ni boruak thiang tak lothleng ta hian he khawvela nungdama ka lo la awm ve te, boruak thianghlim tak hip theia hriselna min petu Pathian chungah lawmthu  ka sawi mawlh mawlh a ni. Van chu a thiang kuk a, kawlkil lamah chhum tlem a awm pheuh pheuhin, chu chuan van boruak paw dal ruih mai chu a chawhpawlh mawi lehzual a ni. Chungleng savate chuan Pathian fakin an aw neih ang angte chuan an riat nak nak bawk a. 

Chutia ka zing tho boruak thianghlim hip a kan varanda a ka awmlai chuan Hla pakhat hmangin Pathian thlarau chuan min rawn pawl ta a. Chu hla chu ka hriat lai lai chu thiam lem lo takin ka sa rat rat a.  He hla Larry an Pathian thlarau pawlna nena alo siamchhuah hian nasa takin min khawih a, ka tap ka tap mai a ni. A thunawn lai chuan ka rilru a khawih zual a.

Khawvel parmawina leh ropuina chan mah ila,
    Lal Isua ka nei ta engmah reng reng  ka ngai tawh lo;
    Amah nen chuan leng dunin harsatna karah pawh,
    Ka thlarau a chawm leh thin.

Ringtute ngei pawh hi khawvel rualawhna hian min tibuai thin a. Rualawhna avangin Lalpa kan phatsan fo mai. Dik lo taka sum hai luh duhna te; rorelna dik lo taka kalpui duhnate hi Christian inti ramah ngei pawh hian a bâng si lo. Lalpa hnena kan kir leh a simna tak tak kan neih hi ava pawimawh em. Ram hruaitu, alianber atanga tan a kan Zoram mipui hian simna tak tak nen, saiip puan sin a, Lalpa hnena kan kir leh hi a pawimawh takzet mai. 

He hla hi YouTube atangin ka play ta a, thinlung a khawihin, lawmna mak tak chuan min rawn tuam ta a ni. Kan ramah pawh Covid avangin mi tam takin nun an chân a, kan buai em emin, sorkar lu pawh a hai hle a ni. Heng harsatna kan tawh lai karah hian Lal Isua nen chuan lengdunin kan nun chawmtuah i hmang ang u hmiang. Sum leh paia duhamnate, in ropui leh nawmsak thlakhlehnate hian lawmna min pe rei lo. Lal Isua chauh hi kan lawmna, kan hauhsakna lo ni se; kan mamawh engkim min pe zel dawn a ni.

Kan ramah Lal Isua hi Lalber sela; roreltuah hmang ila, kan inghahna lo ni teh se. Khawvel hi kumhlun tur a ni lo tih chu kan hre theuh; mahse, kumhlun tur ang maiin kan cheibawl ta a nih hi. Ringlotute tana entawntlakin kan awm nahek lo. A chang phei chuan ringlomi kan tihte ai hian kan duhamin, sual pawisakna kan nei lo zawk ni te hian ka hre thin. Pathian hian tuipuiral hla tak atangin missionary rawn tirin min rawn zawng chhuak a; a rawngbawla a Chanchin Tha hi hnam dangte zingah hril darh turin min duh bawk. Mahse, tun ang reng simna nei lova kan awm chuan Lalpa hian min hawisan mai tih hi a va hlauhawm em!

Ka theih ang tawkin ka tleirawl tet lai atanga Lalpa rawngbawlin ka lo penchhuak ve a. Ka penchhuah tirh atang  hian harsatnate, khawharna, thlemnate, lungngaihna nasa takten min tuam chang a awm thin. A chang chuan lawmna nasa takin ka tawh chang a awm bawk. Ka hun kal tawh te, tling lo taka ka rawng lo bawl thinna te ka thlir a. Lal Isua bak neih ka duh hian min tibuai thin. Duhamna te, rualawhna te hian kan nun min tibuaiin, chu chuan kawng dik lo zawh mai duhna kawngah te mi hruai thin a ni tih te ka ngaihtuah. Mahse, Lalpa chuan ka pensan phal lovin min venghim tlat a, chak lo leh tling lo takin ka ni chungin Ani chuan ka nihna angin min pawm duh a ni. 

Khawvel mawina leh ropuina lem te, duhamna leh rualawhna  te hian kan thlarau nun min chawm si lo. Khawvel ropuina leh parmawina kan chan tam poh leh Lal Isua hi kan tan a ropui zual zel a ni tih min han hriattir nawn leh a, ka tap a,ka mittui a tla a; Isua tana ka tlin lohzia leh ka tlak lohzia min hriat nawn tir leh a ni. Lal Isua ka chhar ta engkim dang aia hlu zawk chu, ava ropui em! Harsatna karah pawh a ka nun min chawm thin tu chu Isua chauh a ni tih ka hrenawn leh ta. Lalpa nang chauh hi  kan nei che a, engmah dang reng kan ngai tawh lo, tia Lalpa hmaah thingthia Zofate hi kan auchhuah hi a va pawimawh em. Amen.