Tun hnaia spyware lar tak pakhat chu Pegasus a ni a, khawvela inenthlakna software-ah chuan changkang leh tha ber ni hialah mithiamte chuan an chhal hial.  

He software hi Israel cyber firm NSO Group ten an siam chhuah a ni a, khawvel ram hrang hrang hruaitute lu tihaitu ber pakhat a ni mek - India parliament thut khawm neih mekah pawh he spyware avanga inbeihna thleng avangin vawi tam tih tawp a ngaih phah a ni. 

Pegasus hmang hian India rama hruaitu thenkhatte chu enthlak an ni a, hei hi opposition lamte puhna niin sawrkar chu insawifiah turin an nawr nasa hle a ni. 

Pegasus chu eng nge?
He sowftware hian iOS leh Android hmangtute smartphone chu awlsam takin a luhchilh thei a, phone hmangtute inbiakna leh an thil tih hrang hrangte chu an hre zung zung thei a ni. Hei vang hian ram hruaitu lawk leh mi pawimawh tak takte enthlak nan an hmang a, khawvel chawk buaitu pakhat a ni chho mek. 

Text message bakah, call leh password zawng zawng pawh a hre vek thei a, hei hi a hlauhawmna tak pawh a ni. He software hi smartphone-ah a luh tawh chuan paih theih a ni tawh lo a, phone leh SIM card thlak chu a pumpelhna awm chhun a ni. 

Pegasus hi August 2018 khan hriat chhuah tan a ni a, human rights activist pakhat iPhone-ah install an tum a, a hlawhchham avangin an hre chhuak zui ta a ni. He software hi ram hruaitute bakah, journalist, activist leh mi pawimawh tak takte enthlak nan hman ber a ni a, tuma hriat lohin mi pawimawh tak takte chuan enthlak an lo tawk reng thei tihna a ni! 

August 23, 2020 khan Israel newspaper pakhat Haaretz chuan NSO Group hian Pegasus spyware software chu US dollar maktaduai 100 velin United Arab Emirates hnenah an hralh niin a tarlang a, Al Jazeera pawhin he software hi an rawn chhui chiang chho bawk. 

Kumin July atangin Pegasus hi khawvel hriatah a rawn lar chho ta a, ram hruaitu hrang hrangte chuan enthlak an tawk reng thei tih hriaiin an fimkhur thar zual a, France President Emmanuel Macron pawhin a phone hman lai leh SIM card te chu a thlak nghal thu a puang a ni. 

Pegasus hmang hian India rama mi pawimawh tak tak 10 chuangte chu enthlak niin tarlan a ni a, chung zingah chuan Supreme Court-a thawkte pawh an tel nia tarlan a ni. Hetih lai hian India chuan he software hmang hian Pakistan Prime Minister Imran Khan chu a enthla nia tarlan a ni ve thung a, ani bakah hian - Iran, Afghanistan, China, Nepal leh Saudi Arabia diplomat te enthlak nan a hmang bawk nia tarlan a ni. 

Mexican drug cartel te pawhin an hmang tangkai hle a, Saudi Arabia chu he enthlakna hmangtu zingah hian tarlan a ni bawk. 

Pegasus hmanga enthlak zingah khawvela hausa ber nihna chelh mektu Jeff Bezos pawh a tel nia tarlan a ni. 

Pegasus hmanga enthlak hi mi 50,000 vel zet an awm tawh nia tarlan a ni a, chung zingah chuan journalist pawh 100 bawr vel an tel nia tarlan a ni. Chung zingah chuan khawvel huapa media firm lar ber ber - The Guardian (UK), The Washington Post (United States), Haaretz/TheMarker (Israel) leh The Wire (India) a thawkte pawh an tel nia sawi a ni. 

Hetih lai hian Pegasus siam chhuaktu company te hian inenthlak kawngah demna tur an awm lo tih an sawi a, an mahni dawrtute chu dem tur zawk an nih thu an sawi mauh mai.