Aizawl: Sawrkar laipui, Ministry of Labour & Employment hnuaia hnathawkte hamthatna Employees’ State Insurance Scheme hnuaiah mi 1589 an in ziaklut tawh a. ESI thawktute chuan ESI chu mipuiin an hre tawk lo nia an hriat thu leh chhawr tangkai se an duh thu Zalen an hrilh.
Employees’ State Insurance Scheme hi kum 2016 atang khan Mizoramah bultan a ni a, he scheme hnuaiah hian hnathawk mi 10 leh a aia tam nei chinte chu in register tur a ni a. Thla tin Rs. 21,000 hnuailam hlawh chin te chu an hlawh atangin a ruaituin thla tin 4.75% a dah a ngai a, a thawktu (employees) in a hlawh atangin thla tin 1.75% a dah a ngai bawk a ni. In-register hi online veka tih a niin registration an tih zawah ‘Pechan card’ pekchhuah an ni a, hemi hmang hian damlohna an tawh pawhin enkawlna hi a thlawnin pek vek an ni.
Employees' State Insurance, Aizawl thawktute chuan damdawiin thawhpui (tie up) pathum BN Hospital, Adventist hospital leh State Referral Hospital, Falkawn te an nei tih sawiin heng bakah hian Laboratory ah Genesis leh Trinity Diagnostic te an thawhpui tih an sawi a. Damlo chu ESI Doctor in a en hnuah an nat dan a zirin an thawhpui damdawiinah a thlawna enkawl an nih bakah laboratory leh zai (operation) pawh a thlawn vekin kalpui a ni a, hei bakah damdawi pawh a thlawnin pek vek an ni tih an sawi bawk.
Zalen zawhna chhangin Employees' State Insurance thawktute chuan tuna hamthatna hi hnathawktu bakah a nupui/pasal te, an fate leh nu leh pa chawmte tan hman (enjoy) theih a ni tih an sawi a. Mizoramah hetiang hnathawk ruai school, private damdawiin, private bank, showroom leh mi engemaw zat an awm tih sawiin heng mite hian registration hi ti se, hamthatna hi dawng thei ngei se an duh hle tih an sawi bawk.

Employees' State Insurance hnuaia hamthatna
Hnathawktu in kum 3 chhungin ni 90 sickness leave a la thei a, thawh loh hlawh 70% a dawng thei.

Nu in fa 2 a neih chinah nau neih chawlh (maternity leave) kar 26 thleng a nei thei a, nau a chhiatin kar 12.

Hnathawktu thihin family pension a awm.

Chetsual palh vang/ban a nihin kum 1

Hna vanga ramtuileiloa awm te tan thlakip hlawh.

Thihin vuina senso Rs. 10,000 thleng pek theih a ni.
&&&&&&