Chelsea neitupa Roman Abramovich chuan sawi leh sel hlawh tak European Super League-a tel ve tura thu tlukna an lo siam chu an thil tih sual lian tak a nih thu leh an club fans te chungah thinlung taka ngaihdam a dil thu a sawi chhuak. Chelsea hi ESL zawm tuma inziak lut Premier League club paruk zinga inhnukkir hmasa ber an ni .  

“Club neitupa leh board lamin ESL zawm tura thu tlukna kan siam kha kan ti sual tih kan pawm a, a pawi kan tiin ngaihdam kan dil tak meuh meuh a ni,” tiin club chuan thu chhuah an siam a ni. 

He league kan zawm chhan ber pakhat chu English leh European lama kan hmelma te hnunga awm kan hlauh vang a ni a, mahse he league kan zawm avang hian kan hming thatna kan hloh thei tih kan hriat chhuah ran avangin kan inhnukdawk leh nghal a ni. Blues thuneitute chuan ESL atanga inhnukdawk leh tur hian club supporter group hrang hrang an biakrawn hmasak thu an sawi bawk. 

ESL zawm club dang supporter pawhin duh lohna an lantir ve mek a, Zirtawpni zana Everton nen an inkhelh lai khan Gunners fans 1000 chuang chu; Emirates Stadium pawnah pung khawmin club neitupa Stan Kroenke-a chu ESL chhuahsan tura an duh thu an au chhuahpui. Tottenham Hotspur supporter’s trust te pawhin club board te chu ESL chhuahsan turin an ti ve bawk.